Aizawl: ZPM Thalai President Jeje Lalpekhlua, MLA chuan Indian Air Force-in Lengpui leh Sihphir ram a lak chungchangah CBI-in an chhui theihna tur Chief Minister Lalduhoma’n consent a pe chu lawmawm a tih thu a sawi.
Inrinnia thuchhuah an siamah Jeje Lalpekhlua, MLA chuan, IAF-in Lengpui leh Sihpir ram a lak chungchangah corruption a awm thei nia rinhlehna a lian hle a, Mizoram mipuite pawhin CBI te inrawlh ngei turin an beisei hle tih a sawi a. He thil dik lo chhui tur hian Ruata Sailo pawhin Lok Ayukta-ah complaint theh lutin, MPCC pawhin CBI ah complaint theh lutin, MNF pawhin Chief Vigillance Officer hnenah complaint an thehlut tih a sawi.
ZPM party pawhin CBI a complaint thehluh an tum mek laiin, CBI, CVO leh Lok Ayukta-ah complaint a luh tawh avangin Mizoram sorkarin February ni 23, 2026 khan a rang thei ang bera chhui turin CBI hnenah phalna a pe ta tih a sawi a. CBI te hian he case hi chhui tlaka an ngai a nih chuan an rinhlelh zawng te an chhui tawh mai dawn a, hei hian Chief Minister hi he case-ah hian a kut a fai zia a lang chiang hle tih a sawi.
ZPM Thalai President chuan ZPM sorkarin Mizoram State chhungah corruption an do let zel dawn a, hemi kawnga huaisen taka kawng sialtu Chief Minister Lalduhoma an nei chu thlamuanthlak an tih thu a sawi bawk.