Aizawl: MPCC Sr Vice President Lalnunmawia Chuaungo chuan MGNREGA hming thlak avangin vai pathian hming lam tel a ngai tawh dawn tih a sawi.
Inrinni zing khan Congress Party huaihawtin Serchhip College pengah BJP kaihhruai sorkar laipuiin VB G RAM G ti-a MGNREGS a thlak duh lohna lantir a ni a. He huna thusawitu MPCC Sr. Vice President Lalnunmawia Chuaungo-in ni za inhlawhna an tih mai MGNREGA chu BJP kaihhruai sorkar laipuiin a hming thlak avangin vai pathian hming lam tel a ngai tawh dawn tih sawiin, sorkar laipuiiin MGNREGA hming thlaka vai Pathian hming lam tel ngei ngei turin VB G RAM G tih an vuah chu sakhaw tih bik nei lo, Secular State an nihna ti daltu a ni tih a sawi a. Ni za inhlawhna hming thlak a, an vai Pathian hming lam tir tum an ni hi Congress Party chuan a duh lo va, an dodal tih a sawi.
Central BJP hian ni za inhlawhna chu tidanglamin, ni 125 inhlawhna tur angin rawn sawi mah se, a theih dawn loh tih sawiin Lalnunmawia Chuaungo chuan, “Senso za a sawm hi state sorkar tum tur a ni tawh a. Zaa za a nihlai pawhin ni 80 vel bak inhlawhna kan siam thei lo. A ni ti tam mah se kan tlin dawn lo. Thil tha tak anga lang, a taka tha silo a ni. A pawnlang a thlum a, a chhungril kha tak ang kha a ni,” a ti.
Lalnunmawia Chuaungo chuan chhungkaw tam zawk ten eizawnna ngelnghet an neih theih nan NLUP kal tawh dan ennawn chungin an buaipui leh dawn tih sawiin, “A famkim lo lai leh thalo lai ngun takin kan zir chiang a, NLUP tha zawk leh changtlung zawk hi mipui tan chhawp chhuah kan tum,” a ti bawk.