Aizawl: Ministry of Youth Affairs & Sports hnuaia Khelo India Scheme a, Rs nuai 450 senga, Durtlang North-a Multipurpose Indoor Hall sak thar chu PWD Minister Vanlalhlana’n Inrinni khan a hawng.
Multipurpose Indoor Hall hawnna inkhawmah Aizawl North I bialtu MLA ni bawk Vanlalhlana chuan, a bial chhunga Multipurpose Indoor Hall an neih theihna tura Sports & Youth Services ,inister leh department-a thawktute hmalakna chu fakawm a tih thu a sawi a. |halaite tan sorkar inpekna leh talent nei thate chher chhuah a tumna a lantir a ni tih sawiin, he hall hi Mizo thalaite international leh national level inelna a tel phak khawpa chhertu a nih theih nan duhsakna a hlan a. Hall panna kawng pawh siam that a nih dawn thu a sawi.
Inkhawmah hian Sports Minister Lalnghinglova Hmar pawhin thu a sawi bakah, South Tuipui bialtu MLA Jeje Lalpekhlua, Lunglei North bialtu MLA V. Malsawmtluanga leh Hrangturzo bialtu MLA Lalmuanpuia Punte-ten an tawiawm.
Multipurpose Indoor Hall hi Ministry of Youth Affairs & Sports hnuaia Khelo India Scheme hnuaia sak a ni a, a project cost hi Rs nuai 450 a ni. Hnathawktu atan Lushai Engineers, Ramhlun, Aizawl chu thlan a ni a, March 18, 2024-ah hnathawh bul tan niin, February 23, 2026 khan zawh fel a ni.
Hall hi March 18, 2024-ah sak tan niin, kumin February 23 khan zawh fel a ni a. Hall hi a dung lam metre 46 leh a vang metre 20-a zau, metre 9-a sang a ni a, a sir tawn tawnah mi 200 vel thut theihna tur Spectator Gallery leh VIP Gallery siam a ni a, Gallery hnuaiah player changing room pahnih, official room, VIP Rest Room, Medical Room leh store-room siam a ni bawk.
Hall hi indoor sports discipline hrang hrangte hman theih turin a chhuat pawh 7mm-a chhah, PVC Vinyl Sports Flooring phah vek a ni a. Volleyball net pole leh net dah tel a nih bakah building hma lam tualzawl pawh PCC flooring-a siam nghal a ni.