Aizawl: India Vice President C.P. Radhakrishnan-a’n Mizoram University (MZU)-in Convocation vawi 20-na, Multipurpose Hall, MZU Campus, Tanhrila neih chu Inrinni khan a hmanpui a, MZU hnuaia zirlai 6,385 hnenah degree hlan a ni.
Vice President chuan hmarchhaka thiamna sang zawk zirna in tha leh campus nei tha berte zinga mi, MZU-a convocation a hmanpui thei chu lawmawm a tih thu a sawi a. Nakkin lawka ram leh hnam bakah mahni mihring puite rawngbawl sak tur thalaite nena hun hman chu nuam a tih zawng a nih thu a sawi a. Zirlai hlawhtlinna chang zawng zawngte thinlung taka a lawmpui thu a sawi.
Degree chu zir zawh entirna certificate mai ni lo, hma thar lakna tur entirna certificate a nih thu sawiin vice president chuan, thalaite chu hna zawngtu nih ngawt tum lo va, a siamsaktu nih tum tur leh remchanna zawngtu aia siamsaktu nih tum turin a chah bawk.
MZU Chief Rector ni bawk, Larsap General (Dr) Vijay Kumar Singh pawhin MZU-in kawng hrang hranga hmasawnna a hmuh thu sawiin, tun dinhmunah chuan hmarchhak state-a zirna sang zawk zawm theihna ngaihhlut leh thang duang berte zinga mi a nih thu a sawi a. MZU-in NAAC A+ grade a hmu chu lawmawm tiin zirna bakah vantlang rawngbawlna kawnga an hmalaknate fakawm a tih thu a sawi.
Chief Minister Lalduhoma pawhin thu sawiin, zirlai hlawhtling thar zawng zawngte a lawmpui thu sawiin, MZU convocation hmanpui tura lo kal vice president chungah lawmthu a sawi a. Zirna tihhmasawn kawngah Mizoram sawrkarin Mizoram Engineering College chu kumin atangin class tan tum a nih thu leh Mizoram State University kalpui tura hmalak zel a nih thu a sawi.
Inkhawm hi MZU Registrar Prof. Lalnundanga’n kaihruaiin Vice-Chancellor Prof. Dibakar Chandra Deka-a’n inlawmna thu a sawi a. Degree, gold medal leh book prize winner lawmman hlanna hun hman a ni a. Registrar-in lawmthu sawiin convocation a khar a ni.
MZU Convocation-ah hian zirlai 6,385-te hnenah degree hlan a ni a. A hmuna degree dawng 1,113 an awm a, he’ng zingah Doctor of Philosophy 147, Master of Philosophy 3, Master’s Degree 486, Master’s Professional 137, Bachelor’s Degree 121, Bachelor’s Professional 174, Gold Medalist 43 leh book prize dawngtu pahnihte kutah degree leh lawmman hlan a ni.
Zirna than nan muanna a pawimawh
Vice President Radhakrishnan-a hian ram chhunga zirna than zel nan muanna a pawimawi a, ramin hma a sawn nan ram ralmuang nih a tul tih a sawi.
MZU-in convocation vawi 20-na a hmanpuinaa hian vice president hian India rama remna thuthlung ziah hlawhtling berte zinga mi, MNF leh India sorkarin kum 1986-a Mizoram Peace Accord an ziah chuan inrem lohna chu dawhkan hmanga chinfel theih a nihzia a lantir tih a sawi a. Zirna than zel nan muanna a pawimawh a, ramin hma a sawn theih nan ram ralmuang nih a tul thu a sawi.
Radhakrishnan chuan Act East Policy-in hmarchhak state-ah danglamna nasa tak a thlen thu leh Asia chhim chhak ramte luhka pawimawh tak a nih tir thu a sawi a. Prime minister kaihhruaina hnuaiah hmar chhak chu India rama hmasawnna bung pawimawh a nih thu sawiin, Bairabi-Sairang railway line hawn tak chuan India ramin zalenna a hmuh atanga kum 78 hnuah Indian railway map-ah Aizawl a chuantir a, mellung pawimawh tak a ni tih a sawi a. India ramin zalenna a hmuh atanga kum 100-na, kum 2047-ah India chu ram intodelh leh hmasawn ‘Viksit Bharat’ a siam tumin sorkar laipuiin theihtawp a chhuah tih sawiin, “Hei hi sorkar programme mai a ni lo va, kan zavaia tanrualna tur anih avangin thalaiten mawhphurhna nasa tak an nei,” a ti.