Assembly session neih mekah Thawhtanni khan Minister Dr Vanlalthlana official resolution put luh, ‘Eighth Schedule of the Constitution of India-ah Mizo Tawng hi telh tura hma lak ni rawh se,’ tih chu pawm a ni.
He resolution a put luh a sawi zaunaah Dr Vanlalthlana chuan Eighth Schedule-a Mizo tawng telh chungchang hi sorkar hmasa lamah pawh assembly house-ah put luh ni tawhin, thlawp a hlawh tawh tih a sawi a. Tunah put luh leh chhan chu, a hma mi pawh rin theih mai lawm ni? tih awm thei ni mah se, a hmaa mi pawh an thai chhe lo va, an nawr chak theih leh zual nan te, sorkar benga an dil mekte a luh nat lehzual nan te, an ngaihtuahnaah a luh tam lehzuak nan te put luh a nih thu a sawi.
Mizo tawng hi India danpui hnuaia Eighth Schedule-a telh a nih chuan hamthatna hrang hrang neih theih a ni dawn tih sawiin Dr Vanlalthlana chuan, “India parliament-ah kan MP-ten Mizo tawngin thu an sawi thei tawh dawn a, chiang leh fiah lehzualin mahni tawng ngeiin Delhi tlangah kan aiawhten thu an sawi thei tawh ang a. Central service-ah mains exam-ah Mizo tawngin an chhang thei tawh dawn a. Mizo tawng hmang thei te tan All India Service emaw, Central sorkar hnuaiah tlin a awl leh zual tawh zawk dawn a. Ministry of Education hnuaiah hian National Translation Mission a awm a. A hnuaiah Eighth Schedule-a tawng awm hmanga lehkhabu tha tak takte hi tawng danga leh kawngah nasa takin hma a la thei dawn a ni. Hei hian Mizo te tan hmasawnna lian tak a thlen theih kan beisei a ni.
“Kum 1957-a din, National Book Trust hnuaiah lehkhabu pho chhuah runpui leh seminar an buatsaih thin a, NBT hian lehkhabu tawng hrang hrang tichhuakin Mizo tawng pawh a tel ve a. Eighth Schedule-a Mizo tawng telh a nih chuan kan ziak mite tan kawng a inhawng thei dawn a. NBT hian a ngaihven lehzual dawn a. Heng Sahitya Akademi te, Central Institute of Indian Languages te, Technology Development for Indian Language te hian Mizo tawng tan hma an la thei tawh dawn a. Parliament-a Mizo tawng a lehlin theih tawh dawn avangin mi tam tak tan hna awm dawn a, AIR leh DDK lamah Mizo tawng hmanga programme tam zawk neih a theih tawh dawn avangin eizawnna kawngah kan thalai tam takte a pui dawn a ni,” a ti.
Eighth Schedule-a Mizo tawng telh hian ngaihven a hlawh tawh tih sawiin minister chuan, “Kan political party-te pawh manifesto-ah kan dah zel hlawm a. Kum 1996-a Ngopa-a YMA General Conference-ah pawh hma la turin a lo pass tawh a, NGO lian tak tak MUP, MHIP, Young Lai Association, Mara Youth Association, Young Chakma Association, Young Bru Association te bakah zirlai pawl heng – MZP, MSU, Chakma Students Union, Bru Student Assn. Hmar Student Assn., Lai Student Assn., Mara Students Organisation, Bawm Student Assn. Pang Zirlai Pawl, Ranglong Students Assn., leh Siam Sin Pawl Pi-te pawhin an lo thlawp tawh a. Mizo Language Development Board-te pawh hemi atan hian a hrangin an lo kawm tawh a ni,” a ti.
Dr Vanlalthlana official resolution hi member-te ngen angin party hrang hrang aiawhin an sawi zui a. Hemi hnu hian Assembly Speaker Lalbiakzama kaihhruaiin house chuan resolution hi a pawm a ni.