Aizawl: MNF Treasurer Lalruatkima chuan Lengpui Land Scam chungchangah MNF treasurer leh revenue minister hlui a nih angin cheng khat pawh party emaw, mi mal anga a dawn a hriat loh thu a sawi a. Mi mal anga a lo dawng a nih chuan a let sawm zela rulh pawh a inhuam thu a sawi.
Thawhlehnia MNF Hnam Run-a inkhawmah revenue ninister hlui, MNF treasurer chuan The Mizoram Land Revenue Laws 2013 leh RFCTLARR Act, 2013 hnuaiah Indian Air Force hian ‘Outright Purchase’ (a hmun leh a hma-a inleisak tawp) hmangin ram an lei ngawt thei lo tih sawiin, “IAF lehkha hmasa subject-ah land acquisition/outright purchase an hman vangin an lehkha ang hian bul tan a ni a. Dan anga land acquisition anga kalpui tur a nih vangin outright purchase tawngkam hi hman zui a ni lo,” a ti.
Lengpui ram pariatte hi Garden LSC a ni a, Sihphir ram pasarih an lei hi House pass leh Garden LSC pakhat a nih avangin ‘Land Lease’-ah thlak leh vek tur a ni tih sawiin, “ZPM sorkar vanga land lease-a dah leh tur a ni lo, ZPM sorkar hma daiha The Mizoram Land Revenue Laws 2013 angin land lease-a dah mai tur a nih zawk a. The Mizoram Land Revenue Rule Sec 28(2) angin Conveyance Deed Registration Act, 1908 angin thla thum chhungin an siam tur a ni a. Dan angin registrar/sub–registrar-ah stamp registration 3% chawiin an ti tur a ni a. The Mizoram (Land Revenue) Act, 2013 Section 75A(4) angin temporary pass an tih mai, Sihphira House pass pasarihah hian 15% share of the government an chhun luhtir tur a ni. Hengte hi vawiin thleng hian an la ti lo hian sorkar inthlahdahzia a lang,” a ti.
Lalruatkima chuan Congress sorkar khan Article 371G hmangin humhalh kan ni tih inhre rengin, The Mizoram (Land Acquisition, Rehabilitation & Resettlement) Act, 2016 kha an lo siam a; mahse, Gauhati High Court Single Bench-ah thubuai thehluh a nih avangin hman zui a remchang ta rih lo va. Chumi chhunga land acquire tur a awm chuan national highways project-ah chuan The National Highways Act, 1956 leh Railways project-ah Railways Act, 1989 hmang turin March 14, 2018-ah a notified thu a sawi a. Kum 2018-a MNF a sorkar khan MLARR Act, 2013 chu Gauhati High Court Principal Bench chuan W.A. 70 of 2018 a registered tak avangin, Mizoten ram neitu nihna chanvo leh ram humhalhna dan, Article 371G neitu a nihna hre reng chungin hma lak zel a ni a. High court thu angin August 7, 2020 khan notification chhuahin land acquire tur a awm chuan RFCTLARR Act, 2013 chu high court thutlukna awm hma chu hman rih mai ni se a ti ta a ni, tiin, Assembly session-ah land acquisition dan mumal awm lo leh sorkar hmasa mawhchhiat phet tumna rilru puin roreltu zahawm tak thenkhatten thu dik lo mipuiah vawrh kual an awm chu MNF chuan pawi an tih thu a sawi.
Lengpui Land Scam chungchanga corruption leh man tang ei an awm anga inrinhlelhna chungchangah, MNF treasurer leh revenue minister hlui a nih angin, cheng khat pawh party emaw, mi mal anga a dawn a hriat loh thu sawiin, “Mi mal anga ka lo dawng a nih chuan a let sawm zela rulh pawh ka inhuam a ni. Kan CM leh revenue minister-te hian hetiang hian an inhuam ve em? tih hi a zawhna a ni,” a ti.