Aizawl: P&E Minister F Rodingliana’n Tuirial Hydel Project atanga Mizoram sorkarin kawlphetha (power) a thlawn a dawn tawh zawng zawng (January, 2026 thleng) zat sum hlut zawng chu Rs nuai 4,300.209 ang vela chhut theih a ni a. Amaherawh chu, heng hi pawisa faiin Mizoramin a dawng tak tak lo.
Assembly Session neih meka lawngtlai West bialtu MLA C Ngunlianchunga ziaka zawhna P&E Minister F Rodingliana’n a chhan danin, Tuirial Hydel Project atanga Mizoram sorkarin Kawlphetha (Power) a thlawn a dawn tawh zawng zawng zat anga lang chu 166.68 Million Unit (Upto Kan 2026) a tling a, heng Kawlphetha (power) sum hlut zawng chu Rs. nuai 4300.209 ang vela chhut theih a ni.
Amaherawh chu heng hi pawisa faiin Mizoram in a dawng tak tak lo va. A chhan chu Tuirial Hydro Power Station in kawlphetha a siam chhuah theih zat zel atanga 12% chu Free Power angin dawn zel thin a ni a. Chutihrualin, Tuirial atanga energy siamchhuah 88% leina man (Tariff) hi CERC (Tariff & Related Matters) Regulations 2019 leh 2024 hmanga chhut a nih avangin, 12% Free Power avang hian a dang 88% Energy leina man hi a to phah hlauh thung.
Single buyer nilo ilang chuan, free power bak 88% hi midangin an lei sak ve thei ang a, tichuan free power avanga a dang 88% leina hi Mizoram chauhin a pek a ngai dawn lo, mahse, Power Purchase Agreement (PPA) ah Single buyer ni turin agreement sign pui tawh si avangin, free power avanga a manto phah ta 88% hi lei leh vek a ngaih tak avang hian, Free Power dawn atanga chhuta a pawisa zat hi chu, 88% leinaah pek leh vek tho a ngaih avangin, Single Buyer tan chuan Free Power dawn hi awmzia engmah a awm lo a ni.