Iran chuan Ayatollah Ali Khamenei-a thah a nih atanga chawlhkar khat chuang a liam hnuah a fapa, Mojtaba Khamenei-a chu an supreme leader thar atan a ruat a. US leh Israel-ten beihpui an thlaknaah indona lian tak a awm mek zel.
Kum 56 mi hian Islamic Republic-in kum 47 chhunga harsatna lian ber a tawh mek laiin a kaihhruai a ngai dawn ta a, Pathianni khan puithiamte chuan a pa thlaktu atan an thlang a ni.
Hruaitu pawimawh tak tak, Iran rama Islamic Revolutionary Guard Corps (IRGC) chak tak leh sipaite chuan hruaitu thar hi an thlawp tih an sawi nghal.
US leh Israel-in an beih atanga Iran venhimna kaihruai tura ruat, Supreme National Security Council Secretary Ali Larijani-a chuan supreme leader thar hnuaiah inpumkhatna a awm thu a sawi.
Parliament Speaker Mohammad Bagher Ghalibaf chuan duhthlanna hi lawmawm a tih thu sawiin, hruaitu lu ber thar zui chu ‘sakhaw leh hnam tih tur’ a nih thu a sawi.
Mojtaba Khamenei hi pisa luah emaw, mipui hmaah pawh ding ngai lo ni mah se kum tam tak chhung chu hruaitu lu ber bul vela huhang na tak a ni a, IRGC nena inzawmna thuk tak a nei a ni.
Tun hnaiah Khamenei hi a pa thlaktu tur anga sawi a ni nasa a. Thlan a ni hi Iran-a a kal na zualten thuneihna an neih chhunzawm zel theihna tur chhinchhiahna a ni thei a, indona hian kar hnihna a luh dawn avangin sorkar chuan hun rei lote chhunga inremna emaw, inbiakna emaw pawm duhna a nei lo hle tih a tilang thei bawk.
Israeli sipaite chuan supreme leader pawh hi ‘kan beih hreh lo vang che u’ tiin a lo sawi tawh.
Pathianni khan Trump-a chuan Iran hruaitu lu ber atana thlan tur chungchangah thuneihna a neih thu a tiam a, Washington remtihna tel lo chuan he hna thawk tur hian tu pawh thlan an nih chuan ‘rei a daih dawn lo’ a ti.
Khamenei fapa thlan a nih hian Trump a tithinrim ngei tura ngaih a ni.
Member 88 awmna Assembly of Experts chuan Pathianni khan ‘America mi sual leh Zionist sorkar sual takin nasa taka beihpui an thlak’ chung pawhin, hruaitu lu ber thar thlan kawngah ‘minute khat pawh an tim dawn lo’ tih an sawi.
Hemi hma hian clerical body hian mi pakhatah an inlungrual thu sawiin tu nge a nih a hming lo thung.
Khamenei-a hian Shia pathian thu zirna, Qom-a seminary-ah puithiam kal nate hnuaiah a zir a, puithiamah hojjatoleslam niin hei hi a laihawl vel a ni.
Kum 37 chhung Iran hruaitu, kum 1979-a revolution kaihruaitu, Ayatollah Ruhollah Khomeini thlaktu hi February 28 khan US-Israel-in Tehran beihpui an thlak tirh khan a thi a, tunah chuan Middle East pumah buaina a chhuak tawh.