Assembly session neih mekah member ten awm dan an thiam tawk lo nia ngaiin Speaker in awm dan mawi zawng turin ngenna a tichhuak ta hial a, ngaihtuah zui a ngai hle.
Kan ram rorelna in sang ber hi tun hma atanga kan roreltuten zahawm taka an lo kenkawh leh an lo luahlum tawh thin a ni a, tun hnai chhoah erawh hi chuan chik leh uluk taka lo en ve thin tan chuan vai ram tih dan kan entawn nimaia ngaih theih tur hian kan khawsa thin a, hei hi a tha lo hle.
Kan ram hi ramdang ang kan ni lo a, aia upate zah thin, nundan mawi tak nei thin hnam, mipa tawng thei leh dak thei nei ngai lo hnam kan ni a, kan chhehvela vai kan tih ang chi tih dan entawn niawm taka khawsa leh che thlenga kan awm thin ta mai hi a pawi a, speaker pawh hian khauh hrek hrawkin house zahawmna hi lekkawh thei se a va duhawm em.
Member pakhat thusawi lai laia member dangin engmah sawi hlei thei lova an lo tibuai leh aukhum chiam chiam thinte hi a ngaithlatute tan hriat a nuam lo a, hun inang pek vek an ni chunga a intibuai zawnga chet hi thiltha niin a lang lo a ni.
Kan speaker hi a nem mah mah niin a lang a, house rorelna kenkawh leh zahawmna a kuta awm a ni tih hriain zahawm leh felfai, hmuh leh hriat nuam thei zawk turin kan rorelna in sang ber hi kaihruai zel mawlh teh se.