Kenya khawpui, Nairobi leh hmun danga ruahsur nasa leh tui lian vanga thi zat chu a let vel zeta pungin mi 42 an tling tawh niin sorkar chuan Pathianni zan khan a sawi.
Zirtawpni khan ruah nasa takin a sur a, tui nasa taka tilianin hmun zau tak a tuam a, mi thenkhat chu tuiah an pil a, lirthei a hnawl a, lirthei tlan a tibuai a, thlawhna tumhmun lian ber a tibuai bawk.
A tira thi zat an sawi chu mi 23 chauh an ni.
Sipai telin agency hrang hranga emergency worker-te chuan ram pumah mi zawn leh chhanchhuah hna an la thawk mek niin Public Service & Human Capital Development Minister Geoffrey Kiringa Ruku-a chuan thuchhuah siamin a tar lang.
Tui lian hian hmun pawimawh leh eizawnna pawh nasa takin a tichhia a, tuiin a lak lirthei 172 erawh lak chhuah a ni tawh thung.
Inrinni khan President William Ruto-a chuan chhawmdawl nan ram chhunga thil pawimawh bika hman tur an dah sa atanga tui lian tuarte ei tur sem tur pek chhuah nghalna turin thupek a siam tih a sawi.
Scientist-te chuan khawvel lum chhoh zel hian Africa khawchhakah tui lian leh ruah tam zawk a surtir niin an sawi a, ruah hi sur rei lo mah se a tam zawk zel tih an sawi.
Kum 2024-a World Weather Attribution zirchiannaah chuan boruak inthlak danglam hian heng lai vela ruah nasa tak a sur theihna chu a hma aia a let hnih zetin a tam tih sawi a ni.