Aizawl: Rajya Sabha MP K.Vanlalvena chuan Aizawl khawpui traffic jam tihreh nan flyover bridge siamsak turin sorkar laipui ngen.
Sorkar laipuia Parliament Budget Session neih mekah Thawhlehni khan thu sawiin Rajya Sabha MP K Vanlalvena chuan, Aizawl khawpui chu tlangrama awm a nih avangin kawngpui neih sate chu a zau tha tawk lo tih sawiin, “Hei hian traffic jam a siam nasat bakah, sorkar office kal te, zirlai leh zirtirtuten a hun takah office leh school an thlen hman lo thin,” tiin, hei hian mipui nunphung a tikhaihlak a ni mai lo va, hmasawnna a tibahlah tih a sawi.
Sorkar laipui hnuaia Housing and Urban Ministry chuan India ram khawpui tam takah flyover bridge an siam tawh tih sawiin MP chuan, state hausa zawk khawpuiah te Union Urban Ministry in flyover bridge an siamsak theih chuan state rethei zawk Mizoram khawpui Aizawlah pawh flyover bridge a siamsak ngei chu a beisei thu a sawi.