Tottenham Hotspur manager hlui, Harry Redknapp-a chuan tun season Premier League-ah Mikel Arteta kaihhruai Arsenal leh Pep Guardiola kaihhruai Manchester City chungchang sawiin champion zawk turin London hmar veng club hi a ring a, City chu pahnihna an nih a ring.
Arsenal chu season kal mekah an che fuh viau a, Premier League-ah Manchester City kalsan turin dinhmun tha takah an ding mek.
Gunners hian vawi 30 an khelh tawh atangin point 67 an hmu tawh a, pahnihnaa awm, City aiin point sarih laiin an sang tawh zawk a, Citizens hi khelh khatin an la khel tlem zawk ve thung.
Arteta naute hi tun season chhungin vawi thum chauh tlawm zawkah an la tang a, goal 22 chauh an la chhuah bawk a. Arsenal hian kum 2004 khan Premier League nomawi an la a, kha kha league-a an champion hnuhnung ber a ni tawh.
Heti chung hian Arsenal hmelma kumhlun, Tottenham manager hlui, Redknapp-a chuan tun season ah chuan Arsenal hi an champion ngei a rin thu a sawi.
Redknapp-a hian tun season-a Manchester City harsatna tawhte pawh a sawi nghal bawk a, “Arsenal hi Premier League-ah an champion ang tih ka chiang a. Manchester City hi an la tha reng a; mahse, ka ngaihdan chuan kum hnih khat kal ta ang khan an tha tawk tawh lo a ni. An player pawimawh thenkhatte hi a hma ang khan an thawk tha tawk lo va. Pahnihna an ni ang a, Arsenal hi an champion ka ring zawk,” a ti.
Season kal meka an chet that avangin Arsenal tantute an hlim hle a, chutih rualin Gunners khelh dan sawisel tawk pawh an awm ve bawk.
Arsenal hian chak leh set pieces atanga goal khung an ngaih pawimawh thu leh kar hnih liam taa Brighton & Hove Albion an hmachhawn tumah khan hun an khawh ral lui nasa nia puh an ni bawk.
West Ham United leh Newcastle United manager hlui, Alan Pardew chuan Arsenal chu tun season-ah champion mah se chhinchiahna dah tel tur a nih a rin thu a sawi.
Pardew chuan, “Football manager thlirna atanga ka en hian an chet dan hi a puitling hle a. Hnehna an chan theih nan khelh dan phung hrang hrang an hmang a; mahse, a nihna takah chuan Brighton khan second half-ah khan an khel tha zawk a; mahse, Arsenal tan khan hlauhawm an ni tak tak lo. Tunah hi chuan Arsenal hi an tlang ngei dawnin a lang,” a ti.
“An hming bulah chhinchhiahna a awm tel ang, a chhan chu an khelh dan hi en ula, hnehna chan tum ringawta khel an ni tlat a ni. An chet dan hi a puitling a, an tum pawh a chiang. An tha a, an chak bawk a; mahse, khelh mawi erawh hmuh tur a awm lo thung,” a ti bawk.