Central YMA Road Monitoring Committee chuan Sairang leh Vairengte inkar National Highway kawngpui siam that mek chu Thawhlehni khan an endik a. Hnathawktu contractor hrang hrangte hmasawn dan chu tha thawkhatah an ngai a; tan lak nasat zual ngai contractor, J. Infratech Limited chu hnathawktu tam zawk lak belh tur leh, hun tiam chhunga hna thawk zo hman ngei turin an hrilh.
Sairang Zero Point atanga Buichali Bridge inkar te, New Khamrang atanga Kawnpui leh Kolasib atanga Bilkhawthlir kawngte siamtu contractor, J. Infratech Limited ten hna thawh zawh hun tura an intiam hun, April 30-a an hna an thawh zawh vek hman loh an hlauh thu CYMA hruaitute chuan an hrilh a. A chak thei ang bera thawk chhunzawm zel tur leh, hnathawktu pawh a tam thei ang ber lak belh turin an hrilh.
Central YMA Road Monitoring Committee-in kawng siam an endiknaah hian Kolasib leh Rengtekawn inkar kawng siam an endik laiin alkatra (Bitumen Concrete mix) kawngpuia an chap darh tawh, road roller-in a la chil muk loh chu chik zawkin an endik a. A sat zawng (temperature) chu pawm theih chin aia a hniam tawh avangin paih tura hrilhin kawng endiktute awm lai hian JCB hmanga hai khawkin an paih leh nghal vek a ni.
Sairang leh Vairengte kawngpui siam hna kal mekah hian, Buichali Bridge atanga New Khamrang inkar thawktu contractor, BRC Company te chuan tun March thla chhung hian thawh zawh vek hman an tum thu Central YMA hruaitute hi an hrilh a. Kawnpui leh Kolasib leh Bilkhawthlir leh Vairengte inkar kawng siamtu contractor, Balaji Constructions Company te chuan hna an thawk zo thawkhat tawh tih an hmu a ni.
Kawng siamtu contractor-te hian kawng siam endiktu an tam lutuk leh, endiktu hrang hrang an kal apianga contractor lama a hmuna thutchilh zingah a hotu lu berten tawiawm zel a ngaih thin avangin, an ni tin hna thawhin a tawrh phah thu te, endiktu hrang hrangten hnathawh hmasak tur chungchangah duh dan hrang an neih thin avangin harsatna an tawh thu Central YMA hruaitute hnenah an lo thlen a ni.
Kawngpui siam endiknaah hian Central YMA Road Monitoring Committee Secretary Er. K. Lalrimawia, CEC leh RS Lalrinsanga, CEC te an kal a. Kolasib Sub-Headquarters YMA Road Monitoring Committee hruaituten an tawiawm bawk a. NHIDCL Project Manager leh Contractor-te atangin an Project Coordinator leh Engineer ten an lo dawngsawng zel bawk.
Central YMA Road Monitoring Committee hian, kumin January 10 khan Sairang leh Vairengte inkar kawng siam hna an endik tawh bakah, Sihphir leh Kawnpui inkar kawng BRTF-in an siam mek chu, January 15 leh 23-ah an lo endik tawh bawk a ni.