Aizawl: Information & Public Relations, Printing & Stationery (IPRP&S) Secretary Betsy Zothanpari Sailo chuan Chapchar Kût 2026 puala Vana Pa Hall-a lemziak leh thlalak phochhuah runpui, ‘Art & Photo Exhibition’ chu Nilaini khan a hawng.
Exhibition hi Directorate of I&PR, Mizoram Art Development Society (MADS) leh Mizo Photographers’ Society (MPS) te buatsaih a ni a. Ni thum awh tur a ni.
Exhibition hawngtu chuan mahni kut chhuak ngei leh ram leh hnam ziarang hlutna pho chhuah a ni chu lawmawm a ti a, ram leilung faten an kutchhuak ngei an inngaihlutsak lehzual a tul thu sawiin, lemziak leh thlalakte chu mi nazawng thiam chi a ni lo va, an kut chhuak hian awmze thui tak leh zirtir tha tak an neih thu leh entu mipuite pawhin ngun taka an thlir a tul tih a sawi.
I&PR Director K. Vanlalsangi kaihhruai hawnna inkhawmah hian Art & Culture Department Director Carol VLMS Dawngkimi leh I&PR officer-te bakah MADS leh MPS member-te an tel.
Chapchar Kût 2026 Art & Photo Exhibition hian March 13, 2026 thleng a awh ang a. Tlawhtuten lemziak leh thlalak pho chhuahte hi an lei thei nghal.
Exhibition-ah hian a vaiin lemziak leh thilsiam 107 phochhuah a ni a, chu’ng zingah chuan Pencil/Charcoal hmanga ziah panga; Mixed Media pathum; Sculpture pathum; Watercolour hmanga ziah 13; Acrylic hmanga ziah 80 leh oil painting pathum a tel. MPS-ten mi 39-te thlalak theh luh atanga thlanchhuah thlalak 126 an pho chhuak bawk.