Beijing-a official ticketing office chuan Thawhlehni khan Beijing atanga North Korea khawpui, Pyongyang pan tur, kum ruk chhunga passenger phur rel tlan leh hmasa ber tur ticket chu Ningania zin tur ni mah se an hralh zo nghal vek tih a sawi.
Kum 2020-a COVID‐19 len tan atanga tihtawp tawh, rel tlan tan leh tur hi ram dang tam zawk laka inkhar tlat, North Korea leh eibara a thawhpui ram ber, China nena an inkara inkalpawhna pawimawh tak chu tihnun a ni leh ta a ni.
Beijing ticketing office chuan ticket hi sumdawng visa nei, entrepreneur, sorkar mi pawimawh leh chanchinbu mite tan chauhva lei theih a ni tih an sawi a. Tlan zel tur tan ticket a la awm a, March 18-a tlan tura ruahman a ni.
China rel kawng thuneitute chuan hriattirna an siamah Beijing-Pyongyang rel hi kar khatah vawi li – Thawhtanni, Ningani, Zirtawpni leh Inrinniah a tlan dawn a, Dandong-Pyongyang inkar rel erawh ni tin a tlan dawn tih an sawi.
March 12 atanga tan leh a nih chuan, “China leh North Korea zin chhuahna, sumdawnna leh sum leh pai lama thawhhona leh mipui inkara inpawhna, inthian thatna a tipung lehzual dawn a ni,” tiin hriattirnaah hian tar lan a ni.
North Korea hi ram dang tam zawk tan erawh khar a la ni a, a tlem te tan tlawh phalna an siam a, henga a tam ber hi Russia tour group an ni tlangpui niin an rama travel agency-te chuan an sawi.
Hripui len hma khan China atanga tlawhtute chu North Korea-a ram dang mi khualzin tam ber niin agency-te chuan an sawi bawk.
Tour buatsaihtute chuan Thawhtanni khan North Korea sorkarin a chhan puan chian lohvin thla thara neih tur, Pyongyang Marathon chu an thulh tih an sawi a. He intlansiak hi ram inhung bing taka ram dang mite tana inelna tlemte zinga mi a ni.