India-a thingpui dawr leh khualbukte chuan Iran indona avanga ei rawngbawlna gas an hmuh tlem avangin inkhar mai thei dinhmunah an ding tih an sawi a, thuneitute chuan industry-te ngenna ngaihtuahtu panel an din ve nghal.
Tuialhthei hi US-Israel leh Iran indona avanga Gulf leh Strait of Hormuz-a a phurtu lawng kal a tawp vangin tlakchhamna a thleng a, a man leh a phurhna man a tisang a. Gulf-a a thawn chhuak tam, Qatar leh Saudi Arabia atanga thawn chhuah leh thar chhuah a nghawng nasa hle bawk.
Khawvela liquefied petroleum gas (LPG) la lut tam ber pahnihna, India hian kar hmasa khan emergency power hmangin a thlifimtute chu in chhung khura hman tur siam chhuak tam turin thu a pe a, hei vang hian mi lo dawngsawng thin industry-te tan an mamawh khawp hmuh a harsat phah.
“Ni hnih chhung daih LPG kan la nei a. A neih theih dan tur kan buaipui mek a ni,” tiin Bengaluru leh Chennai Delhi leh Noida vela dawr 100 chuang nei, Mexican food chain California Burrito dintu, Bert Mueller-a chuan a sawi a. “Gas kan ren a, dawr thenkhatah induction stove kan dah bawk,” a ti.
India oil ministry chuan thingpui dawr leh industry dangte hnena LPG pe tura ngenna an dawnte thlir tur panel a din tih a sawi zui.
Restaurant maktaduai chanve chuang aiawhtu, National Restaurant Association of India chuan Thawhlehni khan food processing ministry hnenah, “Restaurant industry hi hnathawhna atan commercial LPG-ah a innghat ber a ni,” tiin a thlen.
NRAI chuan lehkhaah, “Kan mamawh hi a khaihlak a nih chuan chhiatna rapthlak tak thlengin khar hial kan ni ang,” a ti a. Pawl dang, Federation of Hotel & Restaurant Associations of India pawhin sorkar tanpuina a dil bawk.
Indian company-te chuan kum khat vel chhunga a vawi khat nan LPG man an tisang a, indona hian kum khata LPG hman zat hmun thuma thena hmun hnih lakluh man a tisang a ni.
India-a LNG thawntu lian ber, Qatar chuan kar hmasa khan Iran-in Israel leh US tangdunin an beih avanga chhan let nana Gulf ramte a beih atangin a siam chhuah a titawp a ni.
Bengaluru khawthlang lam tech hub, India’s Silicon Valley tia vuahah chuan thingpui dawr eng emaw zatin an dawng tlem hle tih an sawi a, chin fel a nih loh chuan an ei siam an tawp dawn tih an sawi.
Bengaluru-a thingpui dawr inzawm, Udupi Food Hub enkawltu, Manish V Shetty chuan, “Kan thingpui dawr pakhat chuan vawiin khan gas a dawng lo,” tiin Reuters a hrilh a. “Ei siam nana kan hman sunflower oil man pawh a sang chho zel bawk,” a ti.
Thingpui dawr tlem chauhvin LPG cylinder hi an chhek a, a tam zawk chu lak chawpa innghat an ni tih Bengaluru Hotels Association Secretary Verendra Kamat-a chuan a sawi.
“Gas company tam zawk chuan supply an titawp tawh a ni,” tiin NRAI Bengaluru branch-a mi, Ananth Narayan-a chuan a sawi a, a lo chhek dawrte pawh chawlhkar hnih khat chhunga tawp thei an ni tih a sawi bawk.