Aizawl: ZPM Thalai chuan ZPM sorkar kum hnih kal tawh hnu thlenga Rajya Sabha MP K Vanlalvena’n kawng chhawng a la aupui hian MNF sorkar manifesto hlawhchhamzia a tichiang hle tih an sawi.
Nimina thuchhuah an siamah ZPM Thalai chuan, March ni 10, 2026-a Rajya Sabha thutkhawma MP K Vanlalvena’n Aizawl khawpuia kawng chhawng siam tura sorkar laipui a ngen chu, MNF party-in sorkarna an chelh tawh loh hnu, ZPM sorkar pawh kum hnih a kal tawh hnu thlenga kawngchhawng a la aupui hian MNF sorkar manifesto hlawhchhamzia a tar lang chiang hle niin an sawi.
An thuchhuahah chief minister hlui, MNF President Zoramthanga’n kawng chhawng a lo kawh thlawn tawh chu tui thar leh a, fly-over a sawi mawi leh vel hian MNF party-in policy mumal sawi tur an neih tawh lohzia a tar langah an ngaih thu an sawi bawk.
ZPM Thalai chuan March ni 11, 2026-a Assembly session-a Planning ang Implementation Programme Department enkawltu Chief Minister Lalduhoma thusawi atanga a lan danin, MNF sorkar laia kawng chhawng siamna tur ruahmanna lo awm tawh pawh sorkarin bawhzui mah se, PWD nen kawng chhawng ruahmanna awmsate zirchiangin a taka chantir theih loh mumang ram project a nihzia a tar lang chiang a. Hetiang anih mek lai hian ZPM sorkar pawhin Bawngkawn Traffic jam tihziaawm nan ruahmanna hmun hnihah a siam a nih thu Chief Minister-in a sawi a, heng ruahmannate pawh hi zirchian anih hnua la ennawn leh tur niin a sawi a, ZPM sorkarna hnuaiah chuan a hlawhtlinna hmel hmuh ngei pawh an beisei tih an sawi.