- Dr. C. Lalrampana
Kum 1972 khan Mizoram hi UT kan ni a, kum 17 ral hnu Feb 20, 1987 khan state-ah hlankai kan ni. State kan nih hnuah pawh kum 39 zet a nileh ta mek.
Mizoram sawrkar hian district 11, sub-division 23, RD block 26 leh Autonomous District Council 3 kan nei a. General Administration Department [GAD] hian Deputy Commissioner office 11 leh Mizoram House 7 a enkawl a. Village Council hi 544 vel a awm.
Mizoram sawrkar hian kum 2019-a Allocation of Business Rules hnuaiah a inrelbawl a, department hrang hrang 19-ah statistical cell a awm. Mizoram district-te chu: 1. Aizawl; 2. Lunglei; 3. Saiha; 4. Champhai
- Kolasib; 6. Serchhip
- Mamit; 8. Lawngtlai
- Saitual; 10. Khawzawl; 11. Hnahthial-te an ni.
Mizoram House-te: 1. New Delhi; 2. Kolkata
- Mumbai; 4. Guwahati; 5. Shillong
- Silchar; 7. Bengaluru-te a ni.
Mizoramah sawrkar department hrang hrang 46 vel a awm a, heng hnuaia sawrkar hnathawk zawng zawng hi ni 45,000-50,000 vel an ni. Mizoram sawrkar hnuaia hna thawk mihring zat hi chiang takin a hriat loh va, mahse, Mizoram sawrkar website-ah chuan General Administration Department (GAD) hian Deputy Commissioner office 11 leh Mizoram House 7 a enkawl thu a lang.
Mizoram mipui [population] hi 2026-ah 1,430,000 vel a ni anga ngaih a ni a, hetiang a nih chuan sawrkar hnathawk hi 3.5% vel an ni tihna a ni, kuthnathawka ei zawng hi 70% an awm bawk. A bak 26.5% erawh eizawnna kawng hranga thawkte an ni.
Sawrkar department 46 hnuaiah hian district office & subordinate office hrang hrang engemawzat an awm a, hengah hian office staff tam tak leh controlling officers, subordinate officers [gazette & non-gazette] an awm bawk.
ZPM Ministry din tantirh phat atang khan sawrkar hnathawk mahni hna thawk duh lova aikal la [proxy] dapchhuah hna a thawk nghal a,
Sorkar department 46 awm zingah depth 43 vel chuan aikal la mi 3365 lai an nei a, heti a nih chuan chawhrualin department 43-te hian aikal la mi 78.25 zel nei anga chhut theih a ni a, India ramah state 28 leh UT 8 kan awm a, aikal la tamna ber state kan ni a, ‘The Guinness World Records kan break chiang hle. Chuachhapah mithi tawh 9-in aikal an la tih hmuhchhuah a nileh ta zel a nih kha! A taka Pathian thu nunpui ringtu ni ila aikal la tumah an awm hauh lovang? ZPM ministry hmalakna hi a ropui hle. Tunah aikal la vai rem vek thei rih lo mah se, zaa 90% vel chu a hlawhtling tawh niin a lang.
ZPM Ministry hian Rule of Law a sawi uar a, aikal la tihteh tumin a bei a, kan ziaawm ta deuh duak a. Mahse, hmabak la awm nia lang chu district tin leh sub-division block level zawng zawnga office staff hrang hrang leh controlling officers-te hi an hnathawhna hmun [work place] theuhah hian am awm tha em? Ailak lak chingte ang khan controlling officers-te hian Aizawl Hq atang hian thlatin hlawh lain an staff-te kuta full charge pek ching engzatnge awm? tih leh Office Staff hrang hramg zingah mahni thawhna hmuna awm tha duh lo, aikal la si lo engzatin nge mahni inlum atanga thlatin hlawh mghak chhuak thin tihte leh, thawhpuite kuta mawhhurhna hlana mahni in leh lova tawm tlat thin engzatnge awm? tihte hi a rukin chhui chiang se mahni hna thawk tha duh lo hmuh chhuah apiang departmental action la thin se a tihzia ngawt ang.
A bik takin officers [gazetted or non gazetted]-te hian meeting chhuanlamin Aizawl HQ-ah tan an khawh nasa lutuk a, district mipuite an ngaihthah mah mah thin niin mipui phunnawi atangin a hriat theih. A bikin District Head theuhte awm loh [absent] a pawi lehzual. Hmung sign-tu ber an ni a, document hrang hrang buaipuitu mipui thing tlang mipuite leh khawpui atanga dawrtute tan rei tak tak nghah chhuah an ngai thin.
Department Head Directorate & Secretariat atangtein meeting hi chu a tam thin hle tih hriat a ni. Mahse, meeting-a koh ve loh thleng thlengin chhuanlam siam nana an hmang ve thin nia langte hi thil zahthlak tak a ni. Meeting-a telte ngei pawh tul lo thleng thlenga Aizawl HQ-a cham rei phah nana hmang lui thinte pawh hriat tur an awm nual thei âwm e. Level hrang hranga sawrkar hnathawkte hian an zawn theuhah khua leh tui ram mipuite tanpuia an mamawh phuhruka an harsatna sutkiansak hi an tihtur [duty] chu a ni. Fing vervek taka thawhpuite rin ching leh mahni staff-te kuta mahni hna penper chingte pawh tam tak an awm thin niin sawi a tam hle. Pisa dawrtuten beidawng taka -”Pu ber a awm lova, a zin a, meeting-in a thang bova, a haw hun tur chin pawh a hriat loh kal nawnleh a ngai, ka thil buaipui a khawihtu a awm lova a tihfel theih rih loh, chuti khati …”.tihte hi a tam thin hle. A nihna takah chuan heng sawrkar hnathawk hrang hrang mahni thawhna hmun [work place]-a awm tha duh lo, vak chhuak reng leh chhuanlam dawrawm tê tê hmanga insawimawia insawi thiam chingte hi aikal lak chingte ang tho kha a ni tih kan hriat a tha hle. Chuvangin, Sawrkar thuneitu DP&AR hian mahni hna thawk tha duh lo leh mahni awmna hmuna awm ngai mang lova thlatin hlawh luh leh luh loh ringawt ngaihvena khawsa thinte hi zawng chhuak vek se, Mizoram mipui tan a hlawkin ramin hma a sawn lehzual ngei ang.