Aizawl: March 15 kha Mizoram Presbyterian Kohhran chuan Mizorama Chanchin Tha Thlen Ni champha hmangin, he ni pual hian Pathianni khan kohhran hrang hrangah special programme an hmang.
Kuminah hian Chanchin Tha thlen ni hi Pathianni a nih avangin programme tum hnih – chawhnu leh zan atan siam a ni. Chawhnu inkhawmah ‘Buh seng tur a tam hle si’ tih thupuia hmangin kohhran tinah thuhril tura ruatten thu an sawi a. Zan inkhawmah, ‘Tih makmawh – Chanchin tha hril’ thupuia hmangin sermon ngaihthlak a ni.
Kum 2012 Synod Inkhawmpui chuan Rev. William Williams-a’n Mizoram a lo luh ni, March 15, 1891 chu Mizorama Chanchin Tha Thlen Ni atan a pawm a. Kum 2014 atang khan March 15 chu Mizorama Chanchin Tha thlen ni atan an hman ta a. Kumin hi Chanchin Tha thlen atanga kum 135-na a ni.
Mizorama Chanchin Tha thlen Ni atana an hman, March 15 hi Mizorama Chanchin Tha rawn puang hmasa bertu Rev. Williams-a’n Mizoram a thlen ni champha a ni a. Rev. Williams-a hi Khasi rama Welsh missionary a ni a, Mizote chanchin a hriatin Mizote zinga Chanchin Tha hril a duh hle a, Mizote zingah missionary ni tura a lo kal thei lo chungin Mizoram tlawh hram a tum a, Silchar DC remruatpuinain sipai ho ruala lo kalin Mizoram a rawn lut a, a hmasa ber atan Mizote zingah Krista Chanchin Tha a rawn puang ta a. Chuvang chuan, Rev. William Williams-a’n Mizoram a rawn thlen ni hi Mizoram Presbyterian Kohhran chuan Mizorama Chanchin Tha thlen ni atan a hmang ta a ni.