Aizawl: Tun hnaia Zobawk North nu pakhat, F Lallawmkimi, nau a hrin hnu lawka a thihna (rai cheha thi/nau chunga thi) chungchangah All NGO Zobawk North chuan thuchhuah siamin, he thihna chungchangah health minister chu hma la turin ngenin, an thil phut leh ngennate March 21, 2026 thleng an ngaihchan tur thu an tar lang.
An thuchhuahah Lunglei Civil Hospital-in khawlaia nau hring tawh an lo dawngsawng thei lo chu hriatthiam harsa an tih thu leh an dem thu an sawi a. He thihna thleng chungchangah mawhphurtu zawng chhuaka hrem an phut a, zangnadawmna pek a nih theih nan health minister chu hma la turin an ngen.
An thil phut leh ngenna te March ni 21, 2026 thleng ngaichangin, hmalakna a awm loh chuan nasa zawka lungawi lohna an lantir tur thu an tarlang bawk.
Thudawn danin, F. Lallawmkimi (31), PC. Lalremruata nupui, Lunglei Zobawk Venghlun chu March 12, 2026 khan Civil Hospital, Lunglei OPD-ah a inentir a, a ke a vun avangin doctor-in a lung endik turin a ti a, Cardiocologist doctor a lo awm loh avangin a inentir thei lo va, an inentir zo hi thil eng eng emaw lei turin an vak kual a, Lunglei Police Thanna bul thingpui dawra an chawl laiin inthiar a duh thu a sawi a, a inthiarna lamah hian nau a hring a, a hnu deuhah a thi zui.
Hetianga nau a hrin avang hian amah hruaitute chu Civil Hospital, Lunglei-ah kalin thil awm dan an hrilh a, Hospital-a duty te chuan khum a ruah loh thu leh an admit theih loh thu an lo hrilh avangin mi tlawmngaiten lirthei remchang hmangin John Williams Hospital an panpui a, tlai dar 3:30-ah John Williams Hospital hi an thleng a ni.
John Williams Hospital-ah hian Gyanae doctor a lo awm remchan loh avangin doctor chuan Civil Hospital, Lunglei lam biak sakin, lo buaipui tura a ngen angin tlai dar 5:30-ah Civil Hospital, Lunglei hi panpui a ni a, hemi hnu rei loteah F. Lallawmkimi hi biak theih lovin a awm zui a, tlai dar 6:35-ah a thi zui a, a thih chhan hi Sudden Cardiac Arrest (SCA) niin doctor-te chuan an sawi.
F. Lallawmkimi naupai hi a hrin hun tura chhut lawk chu April 17 a ni a. A ruang hi Zirtawpni zan khan lumen niin, Inrinni chawhma dar 11 khan vui liam a ni.
F. Lallawmkimi fa hrin hi mipa a ni a, Kg. 2.700-a rit niin, he thu buatsaih mek lai hian NBCU-ah enkawl mek nia sawi a ni a. A dinhmun a ngaihtuah awm lo nia sawi a ni bawk.