Aizawl: GAD changtu, Chief Minister Lalduhoma’n Lengpui Airport chungchangah Indian Air Force (IAF) nen an indawr zui tawh lo tih house a hrilh.
Thawhtannia Assembly Budget Session-ah zawhna leh chhanna hunah chief minister chuan tun hma atangin Lengpui Airport-ah IAF leh Airport Authority of India (AAI) nen an indawr tih sawiin, “IAF lam offer a tha a, AAI lam erawh an offer a chhia. Mahse, NGO leh political party lamin AAI hnena hlan zawk an tih avangin IAF nen kan indawr zui tawh lo,” tiin, airport chungchangah IAF nen an inkarah thu engmah a awm tawh lo tih a sawi.
Lengpui ram IAF-in an lei hi airport nen inzawmna a nei lo tih sawiin chief minister chuan, “Thil dang daih a ni,” a ti a. “AAI nen char char kan indawr zui a, an phur lo, pe mah ila an outsource leh dawn tih kan hria. Chuvang chuan, mi dang hnena inpe leh dawn a nih chuan Mizoram sorkar phalna a ngai ang tih kan telh a, chu chu an duh tlat lo. Tunah hian kan final thei dawn hnai tawhah kan ngai,” a ti bawk.
Chief minister sawi danin tunah hian Lengpui Airport-a building-te hlutna chhut mek a ni a. Chumi hlutna chu AAI-ten Mizoram sorkarah an pe ang.