Aizawl: MNF National Core Committee (NCC) member Tawnluia, Deputy Chief Minister hlui ni bawk chuan Mizoram humhimna hi India sorkar pawhin Mizoram sorkar remtihna lo chuan a tidanglam thei lo tih a sawi.
MNF Hnam Rûn-a nimina chhung inkhawmah thu sawiin Tawnluia chuan, zalenna sang ber neih hi Mizote chanvo a ni tih a sawi a. Mizo hnam thinlung, Mizo hnam tundin duhna hi district council hunlai atang tawhin Mizote rilruah a lian em em tawh a. Chumi zalenna nei tur chuan, zalenna an sual atanga vawiin thleng hian ala mit lo tih a sawi.
Deputy CM hlui chuan British ho kha kum 1871-1890 ah Mizoram an rawn luta, Mizo Lal te thuneihna chhuhsakin an awpbet a, piputen Mizoram hi an satchhuak a, an dikna chanvo hi British ho an chhuhsak a, British khan an chhuahsan dawnin Mizote chuan an nihna chanvo kha an nei let leh thei ang, tiin thu an dah a, chu chu India in a upbehsakin an duh angin an awpbet zui a ni, a ti.
Tawnluia chuan Mizoram humhimna hi India sorkar pawhin Mizoram sorkar remtihna lo chuan a tidanglam thei lo, tih hi Article 371G-ah chiang takin a inziak a, he remna thuthlung hi zahawm takin India nen an hotu Laldenga te khan an siamtir tih a sawi bawk.
Article 371G- chu ZPM sorkarin an pe let daih tih sawiin Tawnluia chuan, “Dan sakei ti dum dum siin, sum leh pai duh vang erawhin FCAA erawh an adopted leh lawi si. Chuvangin, kan ram humhalhna kawngah thalaite ke an pen a ngai a, Lengpui ram compensation chungchangah pawh CM leh Revenue Minister te hi a mawhphurtu dik tak an ni,” a ti bawk.