June 11-a khelh tan tur FIFA World Cup 2026-ah Iran an tel dawn leh dawn loh a la chiang thei lo va. US, Canada leh Mexico ramten an thlen tur inelna lianah hian US leh Iran inkar boruak that loh avangin harsat a awm mek.
Iran hi ram 48 telna tur inelnaah hian Asian Football Confederation (AFC) atangin tling tawh mah se, khawvel kalphung leh inrem lohna chuan an dinhmun a tibuai a. An group match pahnih chu Los Angeles-ah an khelh a ngai dawn a, Seattle-ah pakhat khelh tura ruahman a ni.
- Eng vangin nge Iran-in World Cup boycott an tum?
Iran hian an group stage inkhel pathum zinga pahnih chu US-a khelh tur an neih avangin an player te, hotute leh tantute himna turah hlauhthawnna lian tak an nei a. An sahimna ngaihtuahna kawnga hlauthawnna avangin thuneituten inhnuhdawh mai rilrukna a neihtira ni.
Sports Minister Ahmad Donyamali-a chuan tun hnaiah an ram team chu World Cup khel tura USA a an zin loh mai hmel thu a sawi a. “He sorkar eiru nasa tak hian kan hruaitu an thah avang hian engti kawng mahin World Cup-ah hian kan tel thei lo ang,” a ti.
US President Donald Trump-a pawhin Truth Social-ah thuchhuah siamin, “Iran football team hi World Cup-ah kan lo lawm a; mahse, an nunna leh an sahimna atan erawh hettah chuan an rawn kal a fuh berin ka ring lo,” a ti.
Iranian Football Association (FFIRI) pawhin social media-ah thuchhuah siamin, “World Cup hi khawvel tana thil chhinchhiahtlak leh ram tin huap a ni a, a enkawltu chu FIFA a ni a, ram pakhat chauh enkawl a ni lo. Mi langsar eng emaw zatin Iran hnawhchhuah an duh a; mahse, ram hnawhchhuah tur an awm a nih chuan a thlengtu ram, an team telte himna pawh vawng thei lo zawk hi an ni tur a ni,” an ti.
Trump-a chuan a thuchhuah hmasa chu sawi fiah lehin, “America chanchina infiamna ropui ber leh him ber a ni dawn. Player te, hotute leh fan te zawng zawng chu mi ropui ang maiin enkawl an ni ang,” a ti.
- Iran hi inhnukdawk ta se eng nge thleng ang?
Iran hi an inhnukdawk a nih chuan FIFA hian a thlaktu tur zawn hna hautak zet an hmachhawn ang a. Dan hnuaiah chuan World Cup tan hmaa ram pakhat an inhnuhdawh chuan FIFA hian a thlaktu tur an thlang thei a ni.
A thlaktu tur hi inhnukdawk ram awmna confederation atang bawka thlan an ni thin a. Iran hi AFC atanga tling an nih avangin anmahni thlaktu tur pawh hi Asia ram bawk an nih a rinawm hle.
- Tu nge Iran thlaktu tur ni ang?
UAE leh Iraq te chu Iran an inhnukdawk a nih pawha an ai awh thei tura rin kai ber an ni.
UAE hian qualifying-ah khan continental play-off stage an thleng a. Iraq erawh chuan UAE hi 3-2 a hnehin intercontinental playoff-ah Bolivia emaw, Surinam emaw March 31-ah an hmachhawn dawn a. An chet chhiat lem loh avang hian FIFA-in Iran thlaktu tur a mamawh a nih chuan Iraq hi tling nghal tura ngaih deuh an ni.
- FIFA tan thutlukna siam a harsa dawn
World Cup tan dawn tepa ram tling tawh thlak hi thil thleng zen zen lo a ni a, hei hian ruahmanna a tibuai a, harsatna tam tak a thlen thei a ni.