Aizawl: Tun hnaia F. Lallawmkimi, Zobawk North, raicheha thihna chungchangah Health Minister Lalrinpuii’n ngaihdam dilin, he thihna chunchangah inquiry lak mek a nih thu a sawi.
Thawhtannia Assembly Annex Conference Hall-a MUHCS 2.0 hawnna inkhawmah Health Minister Lalrinpuii chuan tun hnaia a bial chhunga nu nau chunga thi chanchin chuan a rilru a tihhrehawm thu leh thihna tuartute a lainat thu a sawi a. Damdawi in lamin tanpui ngai ngawih ngawih an lo hnar mai nia sawi chu a lungchhiatthlak a tih thu sawiin, health minister a nih angin ngaihdam a dil a. Inquiry lak mek a nih thu a sawi bawk.
Health Minister Lalrinpuii chuan Universal Health Care Scheme kalpui a nih dawn khan an huphurh hle a, mahse, tluang takin an kal thei leh mipui pawhin a thatzia an hre chho zel chu lawmawm a tih thu sawiin, “Kan kalpui tawh china phai lama kan refer-te hi kan rama kan enkawl theih rih loh natnate an ni hlawm a. Refer tur reng reng hian medical refer board an kaltlang zel a, refer board pawh kan fimkhur a tul hle,” tiin, MUHCS 2.0 hi tha lehzuala kalpui an tum thu leh mipuiin ngaihven tha se, a hun takah inziak lut vek se an duh tih a sawi.