Assam Rifles chhuahsan ram, Heritage Court tlangah Aizawl khawpui chei tharna hnathawh bul tanna lungphun Chief Minister Lalduhoma’n Thawhlehni zing khan a hawng.
Hawnna inkhawma chief minister chuan mipui huapzo pawl hrang hrang telna advisory committee-in he ram hman dan tur he ram hman dan tur a rel a, a thutlukna hi sorkar thutlukna bik a ni lo va, mipui thutlukna zawk tih sawiin, “A ram hman dan tur rawtna hi kan dawng hnem hle a, tuna mi ang hian kan pawm ta a ni,” tiin, rawtna dang dawn belh an tum tawh loh thu a sawi.
Bazar Bungkawna mi mal leh pawlten ram an neih, Aizawl Square atana siam tura tiha ram neitute be turin palai an tir dawn tih sawiin, ram tan a ni tih hriaa rilru inhawng taka lo dawr turin ram neitute a ngen.
Chief minister chuan Aizawl khawpui laili hi hmun mawi tak, naupangte tana lenna nuam, thalaite tana hmun tha, pitar leh putarte tan pawha hawi khawthawnna hmun remchang taka chantir an tum thu sawiin, an zavaia tan a ni tih hriain mi tinin inhawng takin he hnathawh hi thawhpui tura sawmin, a thawktute pawhin a hlawkna lam chauh ngaihtuah lovin ram tan a ni tih hriain thahnemngai takin thawk se an duh tih a sawi bawk.
UD&PA Minister K. Sapdanga pawhin thusawiin, “Hmasawnna project pakhat kan thawk dawn a ni satliah lo va, ramin Pathian malsawmna ropui tak a dawn kan lawm tel a ni,” tiin, UT inthlan hmasa berah khan Aizawl laili atanga Assam Rifle sawn chhuah hi sawi rik a lo nih tawh thu leh an chhuahsan theih nan hian party tinten hma an la vek a. Tuna sorkar hi an vannei a, an hunah a takin a lo thlen tak avangin an zaa an lawmna tur a nih thu a sawi.
AR ram chei thatna tur master plan hi UD&PA duan a ni a, ruahmanna an siamte chu advisory committee hmaah chhawp chhuah niin a tul angin an siam tha a. Advisory committee-in a pawm tawhte bawhzuitu tur steering committee an awm leh a ni.
Ruahmanna tlangpuiah chuan Saron Veng, BCM Biak In atanga intanin chhuah lamah kawngpui laih tur a ni a, Dak Inpui bulah a chhuak ang a. Kawngpui thar sial leh kawngpui awm sa chei nan Rs. vbc 23 dah niin sanction pawh hmuh tawh a ni a, PWD-ten an thawk ang.
- Pawimawh dang:
Bazar Bungkawn atanga intanin Aizawl Square, mawi tak sak tur a ni.
Aizawl Square thlangah hian police outpost dah tura ruahman a ni.
Saron Veng atanga Dak Inpui inpawhna kawngpui kiang hmun remchangah Aizawl khawpui laili chawmtu tur power sub station bun tur a ni.
Lammual sir hmar lamah hian Vana Pa Hall, mi 2,000 leng, hall leh auditorium dang nei tel, lirthei tam tham tak dahna nei sak tur a ni a. Architectural design hi inelna hmanga neih tur a ni a. Nimin atangin registration tih theih nghal a ni ang. May 29 khian result puan hman tum a ni.
Vana Pa Hall thar tur dawt chiah chhim lam tlang, Lammual thlir theihna remchang ni bawkah hian tuizem lian dah tur a ni a. Mawi taka cheia mipui thutna tur tam tak siam nghal tur a ni.
Canteen kualah hian park nuam tak sak tur a ni.
Vana Pa Hall thar leh tuizem dahna tur inkarah hian public park sak a ni ang.
Open amphitheatre hi Dak Inpui hnaih, kawngpui thar kiangah dah a ni ang a. Multi level car parking a awm bawk ang. Kawngpui thar hmun tha laiah khaw thlirna sak tur a ni.
Hmun zau tak hi green zone leh walking trails atan dah a ni.
Heritage Court, Vana Pa Hall ep tlang hi chei that tur a ni a, building pariat chei thata a thenkhat dang thiah tur a ni a. Sak belh pawh a awm bawk ang. Hmun mawi taka siam a ni dawn a, Rs. vbc 13 sengin PWD-in hma a la dawn a ni. Hna bul tan mai turin khawl pawh an chhawp tawh a ni.