Assam leh state dang eng emaw zata inthlanpui neih a nih tur thu puan a nih hnuah Trinamool Congress (TMC) chuan Assam-a inthlan lo awm turah an dinna tur bial tam zawkah anmahnia an chuh dawn thu an sawi.
Thawhtannia thuthar lakhawmtute a kawmnaah TMC Assam President Sushmita Dev-i chuan an state chhungah thawhho lian pahnih awm mah se a party chuan inthlan hi anmahni chakna hmanga beih an tum thu a sawi a, chutih rualin party tenau tlem tê nena thawhhona siam dan tur pawh a dap bawk.
Dev-i chuan bial 51-ah an party hminga inthlan chuh dilna 78 a awm tawh tih a sawi a. Diltute hi an party central hruaitute hnenah thehluh tawh a, thutlukna an siam thuai dawn tih a sawi a. Nilaini hian candidate an puang dawn tih a puang.
Inthlan hun tur chungchanga zawhna siamin Dev-i chuan Election Commission leh Union Home Minister Amit Shah te inkarah inzawmna a awm nia a lan thu a sawi a. “Amit Shah-a’n tlai dar 03:00-ah Guwahati-a a hun hman a titawp a, tlai dar 04:00-ah Election Commission-in a puang a, hetiang hi a thleng ngai lo,” a ti.
Dev-i chuan BJP hian Bihu kût hmaa inthlan zawh fel an duh niin a puh a. Tun tumah hian kût hi ‘Zubeen Da tel loin’ neih a nih dawn thu sawiin kût laia zaithiam, Zubeen Garg-a chungchanga politic-a anmahni beihna awm thei pumpelh an duh niin a puh bawk.
State chhunga rorel lai, BJP sorkar beihin Dev-i chuan Chief Minister Himanta Biswa Sarma kaihhruai sorkar chuan tih a tiam zinga 80% vel a hlen thei lo niin a sawi a. Sorkarin Assam Accord a kalpui that loh thu a sawi a, tun hnaia sorkar hmunhma nia sawia cheng hnawh chhuah pawh dan anga kalpui a nih loh thu a sawi bawk.
Dev-i chuan, “Chief minister hian vote hmuh theihna tur chauhin thutiam dik lo a siam a. A hmaa tih an tiam kha sawiho kan duh a ni. Assam mipuiten BJP thutiam hlen loh an thlawp duh leh duh loh an chin fel a ngai a ni,” a ti.
Election Commission chhinchhiah dan sawi langin TMC chu Lurinjyoti Gogoi-a leh Akhil Gogoi-a te kaihhruai party aiin a chak zawk tih a sawi a. An party chu eptu pawlah tel lo mah se inthlanah BJP-in an hlawk theih loh nan bial tlem têah chauh an chuh dawn tih a sawi.
TMC hruaitu, Dulu Ahmed-a chuan an party-in an ep ber chu BJP a nih thu a sawi ve bawk a. “Kan duhna hmun apiangah candidate kan dah dawn lo va. Congress emaw, eptu pawl emaw candidate-ten hnehna chan theihna hmunah chuan candidate kan insum ang,” a ti.
Ahmed-a hian Zubeen Garg-a chungchangah engmah a sawi lo va, tun dinhmunah he thil sawi hi politic-a her luh tumna anga ngaih theih a nih thu a sawi a. Amaherawhchu, sorkar thar siam a nih chuan, he hla phuahtu nena inhnamhnawih chungchangah hian an party chuan a aw a chhuah chhunzawm zel dawn a, rorelna dik zawngin an kal zel dawn tih a sawi.
TMC chuan Assam-a an chet that chuan parliament-ah Koch-Rajbongshi-ten ST status an dilna leh Adivasi-te ngaihtuahna te an sawi chhuak dawn tih an sawi bawk.