Aizawl: Mizoram Mistiri Association (MMA) General Assembly vawi 11-na chu Synod Conference Centre, Mission Veng-ah nimin khan neih a ni a. LESDE Minister Lalnghinglova Hmar chuan hmanpuiin, MMA Dan Bu 2026 a tlangzarh.
Minister Lalnghinglova Hmar chuan mistiri te chu chhungkaw tana eizawngtu, chhungkaw chawm tura hnathawk tak takte an ni a. Eizawnna hrang hrang awmte zingah hian hna zahawm tak a ni tih sawiin, “MMA hi Mizo hnam dam khawchhuah nan a hlu a, hnamdang mistiri ten hnathawkin min rawn luhchilh a, chutah chuan keini’n kan kut thiamna hmangin tan kan lo khawh a pawimawh a, kan hnam tan thahnem kan ngaih a pawimawh hle,” a ti a. MMA member-te chu an theihna chinah tunlai khawvel thiamna mila inzir ve zel a, hman thiam ve zel tum turin a fuih bawk.
LESDE minister chuan Mizoram Building & Other Construction Workers Welfare Board (MBOCWWB) chu kut hnathawktute ta a ni a, a hamthatna awm theite pawh tihpun a nih thu a sawi a. Kut hnathawktute zawng zawngin he hamthatna awm te hi dawng thei se an duh tih sawiin, MMA member-te pawh hi anmahni bakah an hnuaia thawkte thlengin inziak lut vek turin a sawm.
Mizoram Mistiri Association-ah hian tun dinhmunah member 3000 vel an awm mek a. Mizoram chhungah Branch 115 inziaklut awm tawhin, kumin atan hian Branch 50 velin zawm thar turin hma an la bawk.