Kum 32-a upa hi boyband One Direction atanga khawvel hriatlar a ni a, tunah chuan tleirawl thinlung pu tawh lovin a nun hlui a chhuikir mek. Hlim lohna thlentu hriat a tum a, a tana pawimawh te pawh zirchian a tum bawk.
iHeartRadio’s Secret Sessions-ah Harry Styles chuan a beisei leh rin anga hlim a tum dan leh hlimna a zawn dan te chu a lem mai a nih thu leh hlimna thlen tura a lo ngaih te’n a tak ram a thlenpui loh thu a sawi. “Tunah chuan ka lo upa ve ta. Thil reng reng hi enfiah a, chhuiletna lamah rilru ka pe nasa. Ka nuna thil thleng langsar leh pawimawh te pawh ka chhuilet thin. Mahse, tun hi ka inenletna tawp ber chu a ni dawn lo. Mi tute pawh hian eng hunah emaw ber hian mahni inzawhfiahna leh thil kal tawh enlet a, chhuikir leh hun kan nei thin. ‘Aw.. kha thil khan min tihlim tak tak hlei nem, min tihlim tura ka lo ngaih kha min tilungngaitu lek a lawm a lo nih’ tih te hi kan sawi tam ber a tling,” a ti.
Harry Styles hian sawi chhunzawmin, “Hringnun thlir dan hrang hrang a inang lo thei ang a, mahse, rualkhai leh inbuk tawk taka hman thiam erawh a pawi-mawh tih kan hriat vek ka ring.
“Ka tih tur leh hmabak lam thlir lovin eng hi nge ti ila, hlimna min thlen ang, tih lam zawkah hian ka kal tawh dawn a ni,” tiin a hmalam hun lo la awm tura inbuatsaih a tum dan a sawi a ni.