February ni 17 atanga tan Mizoram Assembly budget session chu thawhtanni khan a tiak a, tluang taka neih niin, speaker in lawmthu sawina tur hrang hrangah lawmthu a sawi a. Mizopa rilru takin an tin thei a, a lawmawm hle bawk a ni.
Kan hriat angin Kristian ram, Mizo tlawmngaihna awmna ram tiin kan insawi thin a, inchhuanna tham pawh a ni. Mahse, a sawia duhtawk chin kan neih avang hian a taka lantir kan nei ngai mang lo thin a; chung zawng zawng hre ve lo ang maiin kan ram rorelna in sang berah chuan pheikhai rual takin rorellai leh eptu lam an la inkawm thei a, an chhuanawm tak zet a ni.
Kan awmna ram India rorelna in sang leh state dangte hi en ila, rorel hleihtheih loh chang leh in auh buaite an ching em em mai a, khawvel ram dangah pawh rorel hlei thei lova an awm chang pawh kan hmu thin awm e. A that zawkna chu lo awm zeuh pawh nise, mipui aiawha thlanten rorelna an nei hlei thei lo hi anmahni thlangtlingtute zah lohna lian tak a ni a; heng zawng zawng hi kan ramah chuan hmuh tur a la awm lo tluk a ni a, han inauh buai leh han inhnial changte chu tan luat vangin nei thin mah se, lungrual takin an inkuah chhuak leh thei thin a, inchhuanna tham pawh a la ni bawk.
Kan ram hruaitute hi an fakawm a, an rorel hrang hrangte kan duhkhawp loh leh kan duh dan lo zawnga rel changte pawh nei thin mah se, mipui lam pawhin pawm dan kan la thiam zel a, heng zawng zawngte hi chhawm nun zel tum ila; ram hrana an ram rorel khawl che thei lova an buaina ang chite hi thleng ve ngai lo turin kan Mizona rilru leh sakhuana rilru atang hian hmalam panin i kal zel ang u.
Politics hri chhia kai lo tura kan insanphek deuh deuh pawh a tul awm e.