Assam Rifles chhuahsan ram hman dan tur sorkarin a duang a, chutiang tur chuan ku a thlak tan bawk. Hei hi hlawhtling chho ngei se a tha hle.
Aizawl khawpui tawtzia leh kawngpui chep tawhzia kan hria a, tuna sorkarin remchang taka hman a tum dan leh a hnathawh hi hlawhtling thei ngei se la, sorkar lo inthlak palh a awm a nih pawhin a hlawhtlin theih nan chhunzawm chho zel thei se a duhawm.
Hmasawnna hnathawh hi chak vut vut chi a ni lo a, chutihrual erawh chuan a hmanna a dik a, ruahmanna a hlawhtlin theih hi a hlu ber leh hmingthat theihna lai a ni thung.
Sorkar pawh hian a dik takin, ruahmanna awmsa ang hian thawk se la, hnathawh a dik a, hnathawh dan tur duan sa anga thawh a nih chuan hmingthat a hlawh mai dawn bakah, damchhunga rotling an khawih tihna a ni dawn a, theihnghilh an har viau ang.
Chuvang chuan tuna AR chhuahsan ram chei dan tur leh siamthat dan tur ruahmanna pawh hi a nih dan tur ang takin hlawhtling thei se la, sorkar pawh hian vil zuiin, enzui peih se, ram tana rotlinga hnathawh tum ngei bawk teh se.