Asia khawthlanga buaina nasa tak karah Indian sorkar chuan February 28-a indona a chhuah atang khan he biala awm mi nuai 2.44 vel India-ah an kir tawh tih Thawhlehni khan a sawi.
Asia khawthlang dinhmun chungchanga inter-ministerial briefing neihah Additional Secretary Aseem R Mahajan-a chuan buaina karah hian tun thlengin India mi panga an thi tawh tih a sawi bawk.
Pakhat hi a hmaa thil thlenga a chin hriat lohva awm a ni a, tun hnaia Oman-a Sohar khawpuia thil thlenga thi India mi pahnih ruang chu Thawhlehni khan India-ah kirpui a ni a, Jaipur-ah an chhungten an dawng tawh.
External affairs ministry thupuangtu, Randhir Jaiswal-a chuan, “Nimin khan zirlai telin Indian 650 velin Iran atangin Armenia leh Azerbaijan an thleng tih ka lo sawi tawh a, chuta tang chuan an rama lo kir leh turin an lo kal leh tawh a ni,” a ti a. “Mi 650 zinga 50 vel hi Armenia-a lut an ni a, mi dang pawh Azerbaijan-ah hian an luh belh leh ang,” a ti bawk.
“Nizan vek khan Iran-a biakzina kal mi 284-te chanchin ka sawi tawh bawk a. Nimin khan tluang takin Armenia an thlenga a. Biakzin 284 zinga 130 chuan vawiin hian Delhi an thleng dawn a ni,” tiin Jaiswal-a hian Thawhlehni khan a sawi bawk.
External affairs ministry chuan an control room chu a thawk reng tih sawiin Indian-te mamawh a ngaihtuah thu a sawi a. Jaiswal chuan call emaw, email emaw an dawng tlem sawt hle tih a sawi.
Asia khawthlang buaina chungchanga BRICS dinhmun chungchanga zawhna chhangin external affairs ministry thupuangtu chuan pawl hian inremna siam nan hna a thawk tih a sawi.
“BRICS-ah hian president nihna kan chelh a. BRICS hian inremna siamin hna a thawk a. In hriat angin he buaina kal mek bikah hian BRICS member eng emaw zat an tel ve a. Chuvang chuan ram hrang hrangte dinhmun inrem lohna zawng zawng rem fel a har hle a; mahse, kan la awm khawm reng a, BRICS-a tel ve zawng zawng nen kan la inzawm chhunzawm zel a ni,” tiin Jaiswal chuan a sawi.
BRICS hi a tir chuan Brazil, Russia, India, China leh South Africa te telna a ni a, kum 2024 khan Egypt, Ethiopia, Iran leh UAE te tel belhin Indonesia pawhin kum 2025 khan a zawm bawk.
Asia khawthlang buaina hi February 28-a intan a ni a, US-Israel tangdunten Iran an beih a. Phuba lak nan Iran chuan American sipai hmunpui awmna Gulf ramte a bei a, tuikawng pawimawh, Strait of Hormuz chu a khar bawk.
External Affairs Minister S Jaishankar-a’n EU Foreign & Security Policy chief Kaja Kallas- sawmna anga Brussels a tlawh chungchangah Jaiswal-a chuan minister hian EU member ram 27-a a thawhpuite nen an inkawm thu a sawi.
“An inkawmnaah hian India leh EU inlaichinna chungchang an sawiho bakah EU-a ram hrang hrang foreign minister-te nen khawvel buaina hrang hrangte an sawiho a, a bik takin Asia khawthlang dinhmun, energy himna a nghawng dan te pawh an sawiho a ni,” a ti.
Buaina hi a hma thei anga a tawp theih nan inbiakna leh palai intira indawr a tul thu an sawi bawk niin Jaiswal-a chuan a sawi.
February 28-a buaina a chhuah tan atang khan India-ah khualzin 2,44,000 vel an haw tawh tih Jaiswal-a chuan a sawi a. Airline-te chuan an hna thawh leh himna atan an ruahman lawk loh thlawhna tlem an thlawhtir chhunzawm tih a saiw bawk.
March 16 khan UAE-a tumhmun atangin India-ah thlawhna 65 vel a thlawk a. Thawhlehni khan UAE-a tumhmun hrang hrang atangin India hmun hrang hrangah thlawhna 70 vel a thlawk bawk.
Oman atangin India hmun hrang hrangah thlawhna a thlawk chhuak reng bawk tih external affairs ministry thupuangtu hian a sawi.