Aizawl: Chief Minister Lalduhoma hovin nimin khan Mizoram Pro-Active Governance & Timely Implementation (Mi-PRAGATI) thutkhawm vawi hnihna neih a ni.
CM Conference Hall-a thutkhawmah hian Aizawl Western side By-pass Road laih mek te, NHIDCL hmalakna te, PM SHRI Scheme hmalakna te, PMJVK hmalakna te leh Railways hmalaknate an thlir ho a ni a. Aizawl Western side Bypass hna hi zaa 19.56 thawh tawh a ni a. Kawngin paltlanga khawsa raltlante sawn dan tur te, mi mal quarry neituten zangnadawmna an phut chungchang te, kawng laihin a nghawng huan thlai chan te zangnadawmna te, forest clearance leh leivung paihna chungchanga harsatna awm mek te an sawi ho.
Mi-PRAGATI hi August thla khan state chhunga hmasawnna hnathawh lian zualte vila harsatna an tawhte chin fel dan dappuitu tur leh a tul anga department thawhhona tichak tura din a ni a. Chief secretary chu member secretary a ni a. Member-te chu principal secretary, secretary leh deputy commissioner te leh state chhunga central sorkar department/agency head te an ni.
- THUTKHAWMA SAWIHO DANGTE:
- Vairengte – Aizawl inkar 4 lane hnathawh mekah electric power line sawn chungchang chu chinfel a nih tawh thu tarlan a ni.
- He 4 lane kawngpui laih mek hi km 90.110 a thui tur a ni a, heng zinga km 60.295 hi Greenfield Alignment tura duan a ni.
- Pradhan Mantri School for Rising India (PM SHRI) Scheme kalpui mekah Mizorama sorkar school 35 te chu PM SHRI kalpuina atan thlan an ni a, thawh ruk (6 phase) a kalpui tur niin a thawhkhatnaah school 22 ah hmalak a ni.
- PMJVK hnuaiah hian Mizoramah project 104 approve tawh a ni a, an zinga 84 chu thawh zawh tawh niin, thawh mek 18 a awm a. Sanction beisei mek a awm nual bawk.
- Sairang – Thenzawl rel kawng survey chungchangah, Thenzawl thlenga rel line kalna tur hi chinfel thawkhat a nih tawh thu sawi a ni.