Aizawl: Doordarshan Aizawl leh Mizoram Indigenous Games Assocation (MIGA) tangkawpin an buatsaih, Mizoram Indigenous Games & Cultural Festival 2026 chu nimin atang khan Ramhlun Sports Complex-ah neih tan a ni.
Mizoram Indigenous Games & Cultural Festival 2026 hawnna inkhawm hi Art & Culture Minister C Lalsawivunga’n khuallian niin a hmanpui a. Thusawiin, culture a thang a, ni tin nun tepawh alo inthlak a, hmasawnna kawngzawh hi an nihna tur leh an tihtur ni mah se, nunphung te alo inthlak a, ei leh in thlenga alo inthlak takah pi leh pu te atanga chin thin, thil tha vawiin ni atanga infiamna chi hrang hrang an entir tur hi a hlamzuih ang tih a hlauhawm tih a sawi.
C Lalsawivunga chuan tunah hian Mizo zawng zawng ten an infiamna, pi leh pu te atanga lo awm tawh an neih hi hre thar leh a, chawi thar leh tur leh hlim taka an hman theih nan, Mizo hnam nunphung leh tihdan phungte chawi lar chho zel turin an inbuatsaih chhoh zel a tul tih sawiin, “Thangthar ten Mizo infiamna chi hrang hrang an hre tha tawh lo va, chin dan tha zawk leh kan culture hi an hnenah hian tuh thar hi a tul hle,” a ti.
DD Indigenous Games & Cultural Festival 2026 hi Zirtawpni thleng neih tur niin, hemi chhung hian Mizo infiamna hrang hrang hmangin inelna neih a ni ang a, zan lamah zaithiam te nen hun hman ho thin a ni bawk ang.