Aizawl: Chief Minister Lalduhoma chuan sorkarin The Mizo Marraige & Inheritance of Property (Amendment) Bill, 2026 a pawm tak hmangin Mizo hmeichhiate dinhmun tha zawk leh zahawm zawkah a hlangkai tih a sawi.
IWD Organizing Committee, State Hub for Empowerment of Women (SHEW), Directorate of Women & Child Development-te buatsaih International Women’s Day 2026 chu Nilaini khan Dawrpui Multipurpose Centre-ah an lawm a. Chief minister leh Social Welfare, Women & Child Development Minister Lalrinpuii ten an hmanpui.
Khuallian chuan Mizote chu hmakhawsang atanga hmeichhiate dinhmun dah hniam ve lo tia sawi theih an ni a, an chan chhiatna lai ber nia lang thin, ‘mak chhiat’ an tawh chang emaw, ‘sum chhuah’ emaw-ah dinhmun chhe taka an awm thin chu sorkarin The Mizo Marriage & Inheritance of Property (Amendment) Bill, 2026 a pawm tak hmangin dinhmun tha zawk leh zahawm zawkah a hlang kai tih a sawi.
Sorkar lai mek chuan hmeichhe MLA pathum a neih bakah Mizorama cabinet minister-a hmeichhia dah hmasa ber sorkar a ni a, a thatzia chu hnam dangte pawhin hmuhpuiin ‘Women Icon Award’ an pe hial tih a sawi bawk.
Chief minister chuan mipa leh hmeichhe tih tlan theih leh nih tlan theih china tehin Mizoram chu India-a hmeichhiate dinhmun that berna state zinga mi a nih a rinawm tih a sawi a. He dinhmun an thlen theih chhan chu thil tam tak karah hnamzia te, sakhuana leh MHIP leh hmeichhe pawl hrang hrang hmalakna vang a nih thu a sawi.
Mizo hmeichhiate chu eizawnna kawngah pawh sorkar hna sang piah lamah sumdawnnaah leh entrepreneurship-ah rilru puitling tak puin, a tlem emaw a tam emaw, eng emaw tal lo thawkchhuak ve theia awm an tum hram hram thin tih a sawi a. Hmeichhiate hmasawnna ram a nih avangin khualzinte pawhin an rawn ngaihven a, an sawi darh mek a nih thu a sawi bawk.
Chief minister chuan sorkar kal laiin hmeichhiate a ngaihsakzia lanna pakhat chu an flagship scheme Bana Kaih-ah a nih thu a sawi a. CM Special Package Pilot phase-ah mi 2,255 zinga 985 chu hmeichhia an ni a; CM Special Package Phase II, tun hnai lawka sem chhuahah mi 458 zinga 211 te chu hmeichhia an ni a; Phase II hnuaia dilna approve tawh, la sem chhuah si loh 397 awm mek zinga 196-te chu hmeichhia an ni a; loan component lamah pawh pilot phase-a loan sanction tawh 394 zinga mi 119 te chu hmeichhia an ni a, Phase II-a loan sanction tawh mi 10 zinga pali hmeichhia an ni tih a sawi.
Lalduhoma chuan WCD hnuaia kalpui, central sorkarin hmeichhiate hamthatna leh venhimna lama hmalaknate a hlawhtlin theih nan sorkar pawh a tang hle a ni, a ti a. Hmeichhiate chunga hleihlenna reng reng chu report turin mipuite a chah a, sorkarin a tih tur a ti zel ang tih a tiam bawk.
Khualzahawm Lalrinpuii pawhin thu sawiin, hmeichhiaten chanvo an chan theih reng, duhsakna an chan loh avanga an chunga tla lo tam tak a awm laiin, chief minister chuan cabinet minister atan hmeichhia ruatin, hmalakna hrang hrangah kaihruaiin, mamawh a thlente a tihhlawhtlinsak thin tih a sawi a. WCD chu hmeichhe hotu hruaina tha hnuaiah thawhhona tha an neih avangin hmalakna chak takin an kalpui thei tih a sawi.
Inkhawmah hian Minister Lalrinpuii’n Women Icon Award a dawn lawmpuina pawl hrang hrang aiawha hlan a ni a. Kawng hrang hranga Mizo hmeichhia hlawhtlinna changte hnenah lawmpuina hlan niin, Vanlalnuntluangi, Miss Grand International, 1st Runner Up, 2025 kaihhruaiin IWD Pledge chham a ni a. MHIP President Lalliani’n lawmthu sawiin hun a khar a ni.