Aizawl: Tourism Minister Lalnghinglova Hmar in Bana Kaih hnuaia District Level Tour Guide training chu Thawhlehni zan khan State Institute of Rural Development and Panchayati Raj (SIRD&PR), Durtlangah a hawng.
Hawnna inkhawmah Lalnghinglova Hmar chuan, Tourism Sector hi eizawnna zahawm tak a nih theih nan theihtawp an chhuah tlan a ngai tih a sawi a. “Tourist kan tih te hi state pawn atanga lo kal chauh an ni lo va, Mizote ngei hi kan state chhungah tourist kan ni thei a, kan tei kual naah kaihruaitu tha kan neih chuan kan hmunhma hmuh te pawh a hlu zual thin a ni,” tiin, trainee te chu an theihna leh thiamna te Mizoram hmasawnna atan hmang turin a chah.
Minister chuan Tourism Department chu department zinga budget tlem leh te ber pakhat ni mah se, eizawnna zahawm thahnem tak siam thei turin ke a pen mek tih sawiin, “Kan ram nuam tak hi thawnthu mawi tak sawi chung zelin khawvel ram zau zawkah kan tar chhuak dawn a ni,” a ti.
Tour Guide te tana training hi Tourism department in khualzinte mumal zawk a enkawl an nih theih nan a duan niin, mi 110 training tura ruahman a ni a. Tun hi a batch hmasa ber niin mi 40 an tel phawt dawn a, batch dang pahnih la awm tur a beisei a ni.