Aizawl Municipal Corporation (AMC) inthlan hun chu April 21 a nih thu State Election Commissioner chuan puangin, model code of conduct hman a nih nghal thu a sawi a, a ngaihawm chho leh tan viau dawn e.
Kan aiawha Aizawl khawpui chhung enkawltu tur kan thlan hun anih avangin mipui pawhin kan ngaihtuahna kan sen a, uluk taka kan mi duh tak kan thlan thiam a tul hle.
Political party zingah MNF leh Congress chuan an candidate tur hi an lo puang tawh a, state a rorel lai ZPM chuan thawhtanni hian puan an tum bawk.
AMC chak, hnathawk tak tak tur, corporator rin ngam thlang turin kan rilru siam la, milar nazawng leh mi langsar nazawngte hi an tha ber kher ang em tih thlengin kan ngaihtuahna kan hman thiam a tul tawh hle.
Aizawl khawpui hian chhantu a ngai a, duat a mamawh a, chumi tur chuan a ngaihna hria, rorelna dawhkana min thutsak thei tur kan thlan a ngai a, hmathlir thui tak leh huaisen taka thutlukna siam ngam kan thlan pawh a tul awm e.
Political party hrang hrang pawhin auhla hran hran neiin, min hip ngei tumin beihpui an rawn thlak leh ngei dawn, kan mi duh leh mi ngheh tak thlang thiam turin kan rilru pawh i lo inbuatsaih ang u.