Aizawl: Mizoram AAP chuan nimin khan thuchhuah siamin, tun hnaia MSACS pisa thar hawnna inkhawma Health Minister Lalrinpuii thu sawi chu dan hriat lohna lian tak nia an ngaih thu an tar lang.
An thuchhuahah March ni 17, 2026-a MSACS pisa thar hawnna inkhawmah Health Minister Lalrinpuii’n ‘kohhranten innei thar tur apiangte HIV/AIDS test-na certificate lo phut se, a duh’ tih a sawi hian, The HIV/AIDS (Prevention & Control) Act-2017 hnuaia Section 8 & 9 a kalh tih an sawi a. Section 8-na Informed Consent-ah chuan court order emaw, medical-a emergency thil a nih loh chuan mi mal remtihna tel lo chuan HIV hi test phal a ni lo va, he dan bawhchhiate chu kum hnih lung in tan emaw, Rs nuai 1 chawi emaw, a pahnih emaw a hrem theih a ni, an ti.
Hei bakah, Section 9na-Confidentialty-ah court order emaw medical-a rikrum thu hla a nih loh chuan HIV dinhmun hi puanzar phal a ni lo va. He dan bawhchhiate chu kum thum lung in tan emaw, Rs nuai 3 chawi emaw, a pahnih emawa hrem theih a nih thu sawiin, “Heng dan bawhchhe tura kohhrante hi ngen chi niah kan ngai lo va, HIV darh zel lohna tura a department chana chak taka hma la zawk turin health minister hi kan ngen,” tiin, innei tharte HIV certificate nei ngei se a duh tlat chuan Kohhrante phut lo vin, Mizoram rorelna sang berah dan thar bill pu lutin dan thar siam ni zawk se kalhmang dik tak zawk a nih thu an sawi bawk.