Aizawl: Mizoram Electricity Regulatory Commission (MZERC) huaihawtin Mizoram State Advisory Committee meeting vawi 28-na chu Ningani khan Aijal Club-ah neih a ni.
MZERC Chairperson Er. Benjamin L. Tlumtea kaihhruai thutkhawmah hian Mizorama power supply tha zawk neih dan tur te, P&E department-in mipuite hnena eng tha tak a pek theih dan tur te, consumer-te hmakhaw ngai taka power supply chungchanga lungawi lohna rang zawka chin fel sak an nih theih dan tur te, AMC area leh AMC area pawn lama fel fai zawka street light enkawl dan tur te, smart metering hna thawh mek chungchangte ngaihtuah a ni.
Heng bakah hian kum 2026 – 2027 atana P&E Department-in power supply enkawl nana sum a mamawh te, sorkar subsidy leh eng chhit man (tariff) hmanga hmuh let leh dan turte sawi ho a ni bawk.
March 20 hian P&E Department-in electricity tariff hman an dilna chungchang hi ngaihthlakna Public Hearing neih leh tur niin, Commission-in mipui atanga rawtna leh sawiselna a dawnte leh P&E department chhannate ngaihthlak a ni ang.
State Advisory Committee hi Section 87, Electricity Act, 2003-in a sawi ang a, State Electricity Regulatory Commission thurawn petu tur atana din niin heng – Commerce, Industry, Transport, Agriculture, Labour, Consumers, non-governmental organizations leh Electric lam kaihhnawiha academic and research bodies hrang hrang atanga mi thiamte member atan ruat thin an ni.