Aizawl: Social Welfare Department leh Spastic Society of Mizoram buatsaihin fate zinga rilru leh pianphunga harsatna nei nu leh pate tana inzirtirna hun hman a ni.
Dawrpui Multipurpose Centre a ‘Sensitization Workshop for Parents of Children with Special Needs’ hi Social Welfare Commissioner & Secretary Lalzarmawii chuan khuallian niin Ningani khan a hawng a. Thusawiin, fate zinga rilru leh pianphunga harsatna nei nu leh pate dinhmun chu eng emaw chang chuan harsa tak a nih tur thu sawiin, beidawng mai lo leh kawng awm ang angte dap zel thei tura inhrilhhriatna neih chu tihmakmawh a nih thu a sawi.
Lalzarmawii chuan nu leh pate chu an rawngbawlna an ko a tla hlen kawngah theihtawp chhuah zel tura fuihin, fanau ro chan malsawmna an dawnte chhiar thiam a, an fate enkawldan tur inzirtirna hun chu hlawkpui ngei tum tlat turin duhsakna a hlan nghal bawk.
Sensitization Workshop-ah hian Mizorama Special School leh Centre hrang hrang atangin rualbanlo fa nei nu leh pa kalkhawm ten ni tin khawsakna kawnga buaina leh harsatna hrang hrang an hmachhawn thinte, an fate harsatna avanga zirna in leh khawtlang nun bakah, chhungkua leh kohhrana harsatna an tawh thinte sawi ho vin, mithiamte nen hmalakho dan tur leh an fate enkawl zel dan tur an zirho a ni.