- K. Hmingthankaia
Ka bial hi a zim khawp maia, mahse, ka kalna ngai hi chu ka kal zing ve viau thung a ni. Ka bial zim ang bawkin ka rilru leh ka vei zawngte pawh hi a te tham thin khawp mai. Miin engahmah an ngaih loh leh an en liam mai mai thin ang hi kei chuan ka lo hahpuiin ka lo buaipui leh tlat thin a ni.
Addict hote hi miin hmangaih leh lainat ena an en theih lai leh an khawngaih em em theih lai hian kei chuan, hnawksak, ninawm leh ngeiawm hmuhin ka lo hmu tlat zel a ni. Hetiang thu hi chanchinbuah pawh ka lo ziak hnem tawh. Khualzin leh Tourist laka kan mualphona tur leh min la ti hmingchhe tu tur an nih ziate, Tourist ho an la bumin an thil an la ruksak mai theih thute ka sawi tawh thin a ni.
CYMA-in addict ho an han thianfai leh deuh duak pawh hi ka lo lawm ve em em mai a. A chhan pawh addict ho hi hmuh hreawm ka ti a, ka mit an tih kham tlat thin vang a ni. Mahse, hei, tunlai hian hmun thenkhatah addict luhlul leh huangtau zual, Aizawl hmun lun lai leh ualau laia zak miah lova a hmei a paa khawsa thin an awm leh ta tlat mai.
Hmun dang chu sawi lovin, ka kal zinna lai zim te, Aizawl bazar pui leh kan veng Venghlui inkar maiah pawh hian addict ho zalen taka awm thin engemaw zat an la awm tlat reng mai hi ka ngaimawh hle a ni. A bik takin Zodin square Solomon Cave bul vel leh Tuikual chhuk thlakna step zau velah hian a hmei a pain an zalen em em reng thin.Transport office vel leh Vanapa hall velah an la awm reng tho. Mizofed petrol pump vel nen.
Hmuh hreawm ka tihna lai ber leh, hnawk ka tih lehzualna lai ber chu, DC office peng, Court road hlui tawntirha a hmei a paa an zalen lutukte,Treasury Bus stand waiting shed hi a hmei a paa an luah nileng zankhua thinte,Treasury atanga Venghlui kalna kawngpui sir, footpath vela zak miah lova an awm reng theite hi hmuh hreawm ka ti thin. Waiting shed phei khi chu a mamawhtu mi pangngai tana han thut vena tur hun leh hmun a awm ngai mang miah lova, thut vena ngam chi pawh a ni ta lo. Addict ho inpui a ni ta ringawt maite hi mak ka ti thin.
Heng ka sawina lai bik hmuna addict zalen ho hi a bul hnai Veng neitute hian an ngaimawh lo emaw, an hnawtdarh ngam lo emaw pawh nise, mikhual leh mipui dang tam tak tan hmuh an hreawma, an hlauhawm bawka, an ninawma, a mawi lova, mit an ti kham tlat thin a ni.
Chuvangin, heng hmun vela addict huangtau zual ho hi a Veng neituten an hnawt boin an khungkhawm bo ngam lo a nih pawhin, CYMA-in Zone a then anga heng lai zone bialtute khan a zone angin hma han la se ka ti hle a ni. Veng mal leh mi mal ang chuan han hmachhawn hi thil nuam lo leh hreawm leh ngamawm loh ve deuh kha a ni si a. Sawrkar leh mi malin kan tih theih loh leh kan tih ngam loh apiangah hian YMA hi kan pun in ngai leh thin si a nih hi.
Nge ni, a rilru tet thlak em mai, an duh duhin lo awm ve mai mai rawh se, kan ti tawh mai dawn em ni?