Aizawl: Bethlehem Vengthlang Branch YMA chuan naupang sikul chawlh lai hmang tangkaiin hnam lâm zirna hun a buatsaih a. March ni 21, 2026 khan Bethlehem Vengthlang Middle Sikul 1 kawt zawlah kharna hun an hmang.
Mizo hnam lam zirnaa hi February ni 26, 2026 ah tanin, tlai dar 3 atanga zir thin a ni a, naupang 100 velin tha takin an zir tluan thei a ni.
Kharna inkhawmah hian Bethlehem Vengthlang Branch YMA President Ralthuama Ralte chuan, “Mizo hnam lam kan zir hian kan hnam ziarang leh Mizo nun zemawi kan chhawm nunna kawngah nasa takin min pui ngei dawn a, kan ram leh hnam boral lohna turin kan hnam ziarang kan chawi nun a pawimawh hle a ni,” a ti a. Aia upa zahna nun ze mawi leh tlawmngaihna te chhawm nun zel a ngai tih a sawi bawk.