Aizawl: MNF Legislature Party Secretary R. Rohmingliana’n a kum telin Mizoram leiba chu vaibelchhe telin a pung zel tih a sawi.
Zirtawpnia MNF pisa, Hnam Runa inkhawmah Thorang bialtu MLA ni bawk R. Rohmingliana chuan, Assembly Budget Session neih zawh taka sorkar kum thar 2026-27 atana Mizoram budget pharh tak kha budget tha lo tak a ni a, budget pumpui atanga sorkar inrelbawlna (revenue expenditure) chu zaa 82.52 a ni a, hmasawnna hnathawhna tur (capital expenditure) chu zaa 17.45 chauh a ni a, chief minister leh minister ten motor pakhat bak kawl lo tura an insawi pawh an bawhchhe vek a, a kum telin Mizoram leiba chu vaibelchhe telin a pung awk awk niin a sawi.
R. Rohmingliana chuan, Mizoram Universal Health Care Scheme chu MNF sorkar hunlaia duan a ni a, September 26, 2023 khan notification tihchhuah a lo ni tawh a. MUHCS tia vuahin April 1, 2024 atanga hman tan tura tih niin, cashless a nih tur thu te, nuai 5 thleng chhungkaw khatin bill theih a nih tur thu te, sorkar hnathawkten an thawh ve turte thlenga tar lan a ni a. Thailand-a health minister hova an han zir pawh khan thil thar an han hmuchhuak vak lo a nih hmel a, MNF duan ang diak diak deuh thawin an hmang niin a sawi.
Lengpui ram hralh chungchanga CBI concent an pekna lehkha hi a complain-tu hnenah a copy pek ve a ni lo tih sawiin R Rohmingliana chuan, chu bakah, a complain-tu Lalpianfela Chawngthu-in a complain-na no 12-naah, chief minister leh revenue minister inrawlhna a tar lan chu CBI consent lehkha ah hian tarlan a ni lo tih sawiin, “CBI consent an pekna hi hei aia chiangkuang zawk ni thei se a tha hle,” a ti.