Sorkar hnathawk pensioner MUHCS 2.0 zawmte an kawppuite inenkawlna bak a huam tawh dawn lo.
Tun hnaia Finance Department thuchhuah tar lan danin MUHCS 1.0-a pensioner zawng zawngin MUHCS an zawm nghal leh an chhungte huam nghal vek chu tih danglam a ni a. MUHCS 2.0-ah hian pensioner-te chuan an duh thlanna hmangin MUHCS hi an zawmin an zawm lo thei a, a zawm duh chuan thla tin subscription fee Rs. 1,000 an pek a ngai dawn a, MUHCS zawmte chuan kum khat chhungin damlo inenkawlna atan Rs nuai 12 thleng an bill thei a, private ward-ah an awm thei dawn a ni.
Pensioner scheme hian chhungkaw member zawng zawng huam tawh lovin pensioner kawppuite chauh a huam tawh dawn a. An chhungkaw member dangte chuan General Beneficiary Category hnuaiah an inziah luh ve a ngai tawh dawn a ni.
Nupaa Mizoram sorkar hnuaia pensioner ve ve chuan an pahnihin a hrana MUHCS 2.0 hi an zawm a ngai a, he scheme hnuaia an inenkawl theihna chu a letin tihpun a ni thung a, Rs nuai 24 thleng an bill thei dawn a. Pensioner-ten MUHCS 2.0 an zawm duh lo a nih erawh chuan CCS (P) Rules, 1972-in a phal angin medical allowance an hmuh thin chu an dawng chhunzawm ang a; amaherawhchu, MUHCS 2.0 hnuaia hamthatna erawh an dawng ve thei dawn lo va, General Beneficiary Category angin emaw, subscriber dangte family member anga inziah luh phal an ni lo.
Pensioner-ten duhthlanna vawi khat an siam tawh chu sut theih a ni tawh lo va, duhthlanna an siam atanga kum khat chhung a nung dawn a, an duhthlanna chu kum khat ral hnuah an sut a ni lo emaw, sorkarin ruahmanna dang emaw a siam a nih loh chuan a kum leh atan hman leh nghal zel a ni dawn a. Kumin April thla hnu lama pension-a chhuakte chuan an chhuah veleh form 1A hmang thovin MUHCS 2.0 hi an zawm thei dawn a, subsribtion pawh an pension thla hmasa ber atangin thla thin Rs 1,000 cut nghal a ni ang.
He ruahmanna hi April 1, 2026 atanga hman tan tur a ni.