Aizawl: MNF Adviser Robert Romawia Royte chuan Aizawl dah pawnlang leh ngai pawimawh lo ZPM party chu AMC-ah sorkar tir chi an ni lo tih a sawi.
Thawhtannia MNF pisa, Hnam Runa chhung inkhawmah MNF adviser chuan ZPM Chief Minister Lalduhoma’n a bial, Thenzawla state capital Aizawl sawn rawtna central sorkarah ziakin a theh lut ngei a, sum pawh dilin an hmu tih sawiin, “Mizoram capital Thenzawla sawn hi Aizawl mipuiten an duhin ka ring lo. Chu mai a ni lo, ZPM MLA pakhat phei chuan session-ah Aizawlah eng thil thar mah awm tawh lo se a duh thu a sawi a nih kha. Hetianga Aizawl dah pawnlang leh ngai pawimawh lo hi AMC-ah sorkartir chi an ni lo,” a ti.
AMC-ah kum 10 chuang MNF a sorkar tawh a, a that leh chhiatah mawh a phur tih sawiin Hachhek bialtu MLA hian, “AMC hi India-a urban local body tha ber pawl a ni a, north east bikah phei chuan an entawn ber a ni. Kan AMC hi an chhuanawm em em,” tiin dawt nena phuah pawlha ram leh hnam pawi tam tak khawihtute hi AMC-ah hian sorkartir ngam chi an ni lo tih a sawi.
ZPM awm hma chuan session-ah house leader, minister leh MLA ten dawt sawi an hlau hle a, dawt sawi hriat tur a vâng tih sawiin Robert Romawia Royte chuan, “Tun sorkarah chuan dawt sawi a tam em em a, an din lai ngeia tih dikna siam ngaite pawh a awm hial,” a ti a. Chief minister leh a nauten assembly session pawh zah zo lovin dawt an sawi nasa hle a. Ruling MLA thenkhat pawhin an CM dawt sawi nasa lutuk chu hreawm an tih thu an sawi hial niin a sawi.