Qatar-a sipai helicopter tlaah a chuang mi pasarih an thi vek niin Gulf ram thuneituten an sawi.
Pathianni khan Qatar tuipuiah ‘khawl lam fel lo’ a awm vanga helicopter hi a tlak hnuah thite ruang zawng zawng hmuh vek a nih thu an sawi.
Qatari sipai pali, Turkish sipai pakhat leh Turkish defence company-a technician pahnih an chuang niin Qatar leh Turkey chuan an sawi.
Training exercise an neih laia tla niin a tlak chhan hi chhui zui mek a ni.
Turkey hian Qatar-ah sipai hmunpui a nei a, hei hi kum 2014-a ram pahnihten ram venhimnaa inremna an ziah hnuaiah a ni.
Thuchhuah siamin Qatar interior ministry chuan helicopter-a chuang mi pasarih chu thih vek thu leh an chhungte chu a tawrhpui thu a tar lang.
Turkey defence ministry chuan Qatari sipai helicopter hian ‘Qatar-Turkey Joint Forces Command hnuaia training exercise a kalpui’ tih a sawi.
Technician pahnih hi Aselsan defence corporation atanga kal an nih thu ministry chuan a sawi a, an tlak chhan dik tak chu Qatari thuneituten an enfiah dawn tih a sawi bawk.
Helicopter hi US leh Israel-ten Iran an beih mek laia tla a ni a, Tehran hian Gulf-a Israel leh US tanpui ramte beihin an ram beihna hi a chhang let ve mek thung a ni.