- Zirsangkima
He pa, “The Most Resilient Man in Hollywood” (mipa inpawt fán thei ber) an tih, a fans leh a thawhpuiten “The Niceest Man in Hollywood” tia hming lem an pêk, Keanu Reeves chanchin hi ka ziak tam tawh hle mai. Pawi ka ti chiah lo a, ka inthlahrung vak lo—mi nun dik leh ngilnei chanchin sawi hi a nuam êm a ni.
- “Thian” aia thuk zawk..a awm lo maw?
Kum 1994-a tih chhuah, film hmuhnawm leh hit zet, “Speed” an chan dun laia inkàwm tan kha an ni a; vawi te khat mah Keanu Reeves leh Sandra Bullock te hian hmangaih biah thu an inhlàn miah lo; a chhin paw’n inngaizáwng angin an awm lo! Thian tha an nihna erawh, khata tang khán, vawiin thlengin, chhut chahin a awm leh tawh ngai lo thung.
“Hmangaihna biah thu an inhlàn ngai lo,” kan ti tak nâ a, a hnu fé-ah—an pahnih hian, vàntláng hmaah—hun hran ve ve-ah—“Speed” film an siam laia “a rûka an in-star ve ve thu” an sawi chhuak leh ang lawi a! An tlai ve ve tawh si! Hei hi kan thupui ber a ni lo a; a tàwp lamah kan sawi chauh ang.
- Sandra khawvel pik chun mai chu
Kum 2010 June thla a ni. Zíng kár atanga Los Angeles nipui khaw dul leh uap churh mai chuan Sandra Bullock-i khawvêl chu a ti zíng zual hle. A lu chu a rit lúk a, thâwk harsat ang maiin na deuhin thâwk a la leh hrâwk thìn. A rilru hahna chu hemi hma thla hnih kalta maia Academy Awards (Oscars)-a “The Blind Side” film avànga “Best Actress” chawimawina a dawn pawh chuan a chhâwk zo lo!
A pindanah nautê, a fa lâk chu a la mu a. Chokaah amaha ngawi renga thuin a melh ngai a melh tlawk tlawk a; a thil en lai chu hmu loin a thlír reng ringawt a nih chu. A hawina lam apiang mai chu a hnawk nuai mai bawk a. An tui dehnaa tui tling pum mai pawh chu a hmuh hmaih lo; thoa va thuah fai tùrin thâ rëng a nei si lo!
An pindan lam a’n ngaihtuah chhuak leh zawk a—a rilru luahtu atána a duh loh êm êm mai chu. Chuta a hriat chian êm êm chu, “a ruak ta huai mai,” tih zawng a ni!
Ni e, a pindanah chuan hmun äwl a zau ta êm a tin ni! A chhan chu, a pasal duh tak, kum nga chhúng hmangaih taka a lo pawm thin, Jesse James chuan pindan leh a nun chu a chhuahsan ta si a! A tih ngai loh angin Sandra chu a tap ta ringawt a…
- Inneihna leh inthenna
Kum nga liam ta, July 16, 2005-a Solvang, California-a ran vulhna hmun (ranch) nuam tak, Folded Hills Ranch-a Jessie James nèna rinawmna thu an tiam dun laite chu a mitthlaah a rawn lang nawn zut zut a. Khami nía designer hmingthang, Angel Sanchez-i kawr design nèna a mawizia te kha…
An thian leh an chhúngte hnênah, an inneih tùr thu an hrilh duh miah lo a; Sandra pian cham (ni 10-in la thleng lo mah se) kum 41-na làwm tùr angin an sáwm a—an inneih thutiam hriatpuitu atán ni loin! Mahse, chûng an sàwm mi 270 vêl hmaah chuan rinawmna thu an tiam ta a nih kha!
Kum nga a vei ta; fa an la nei lo. Bike chei mawi leh design lama mi thiam, West Coast Choppers company neitu, Discovery channel-a “Monster Garage”-a inlan thìn, a pasal James chu hmeichhe dang lakah a hming a thang mawi lo fo ni mai loin a uire hial a! Loh theih lohin Sandra chuan a then ta a ni.
- Kawngka kiktu
Chutia chokaa amah chauha thua a tah keuh keuh lai chuan, tù emaw hian an kawngkapui chu a rawn kik a. A mit nuai hul sawk sawk chungin Sandra chuan kawngka a va hawng. Kawngka biangah chuan Keanu Reeves chu paper bag leh ram pangpár buk tha tak, a thliah chawp tih hriat reng kengin a lo ding reng mai—kum 16 liam taa a film chanpui pa kha!
‘Eng nge i mamawh ka hre lo a…’ inthlahrung takin Keanu chuan a ti sap a, ‘ih … eng eng emaw tlem të ka rawn keng ve a…’
Keanu chuan Sandra chu zawhna a zâwt lo. A chhànna tùr a hre sa vek e. ‘I tha mai ang,’ tiin emaw, ‘Hunin a la liampui mai dáwn aläwm,’ ti emawa a thiannu chu hnem a tum hran lo. A thiam pawh a thiam lo ang!
Tawng duaha a thiannu hnem ai chuan, a kawr bán a pawt chhíng ang sauh sauh a, paper bag-a a thil kensak, ei tùr leh sekrek a mamawh tùr ang chu a phawrh sawk sawk a. Coffee bag a phawrh rualin a siam nghâl sawk sawk bawk.
Chokaa Keanu-a che vêl chu Sandra chuan ngawi rengin a lo thlír reng a— “Speed” leh “The Lake House” film-tea amah hmangaihtu lema chang thìn kha, tünah—a tak takah hian, a nihna a va lang chiang ta si êm!
An pahnih chuan ngawi renga dawhkàn kîlin coffee chu an in dùn a. Keanu chu dâk chhuak hmasain, ‘Hetiang hi nangmah chauhin i paltlang lo ang,’ a ti chhuak ta chauh. Sandra mittui a tla leh ringawt! Inhnít faih chungin, ‘Reeves, ka hria aläwm,’ a ti sap a, ‘nang i awm a…’
Chu ni nguai leh zuai zet chuan, tlai leh zan thim a hmachhawn lo thei si lo a. Chu hunah chuan Keanu chuan a thiannute nufa chu zanriah a buatsaihsak a. Sandra leh a pasal hlui ni ta, Jesse James te fa lâk hlim hlawl, thla thum leh a chanve mi Louis Bardo Bullock chu Keanu chuan a hrai a. Zanriah an kîl dun hnu thlengin Sandra-te nufa kiangah chuan a awm zui ve reng a.
A hàw dáwn chuan kawngkapui atanga hawi lêtin Reeves chuan, ‘Zàn hi rei lutuk i ti a nih chuan min rawn bia ang che aw…’ tiin a thiannu chu a mang tha ta a ni.
- Sandra thian dik tak chu
Kum a liam a—tam tak a liam ta. Sandra Bulluck chuan khami ní-a a thianpa Keanu Reeves-a thil tih kha, mittui nèn a sawi chhuak leh a; heti’n: ‘Pa fel leh pa tha tak—mipa dik tak a ni. Eng mah min dílin thu tam a sawi ngai lo; ngawi rengin ka tán a awm reng thìn,’ tiin. A hnu fé-ah pawh, heti hian Keanu chanchin a sawi leh: ‘Keanu hi tú ma huat theih loh, mi rilru tha leh mi dang ngaihsakna ngah tak mi a ni,’ tiin.
Ni e, Keanu-a kawngka kik mai kha, Sandra khawvêl pik chun vai kiang tùrin a tâwk hle si a!
- Pasal sun Sandra hnemtu
A pasal neih chhúng kum chiah, kum nga a thlawi hnu, 2015 January thlaah Sandra Bullock chuan a fapa Louis-a pian cham a lawmsak dáwn a. Chutah chuan model ni thìn, thlalâk lama ei zawng zui ta Bryan Randall a ruai a. A tawi záwngin—a ruai fuh ngang mai—Louis-a pa a ni zui ta a…
Fa tak an nei lo a, Sandra-i fa lâk pahnih Louis leh Laila bâkah, Bryan-a fa hmasa Skylar te chu, mahni fa hrin ang chiahin, hmangaih takin an pawm zui ve ve a ni.
Mahse, kum nga dang (kum nga zêl!) a lo vei leh a. Bryan chuan natna khirh tak mai, thazám (nerve) zawng zawng ti chhe vek thei, ALS (Amyotrophic Lateral Sclerosis) a vei hlauh! Sandra chuan lemchan lam a chawlhsan hmak bawk. Mahse, a pasal dam loh thu hi a zêp tlat a; Hollywood-a a thian thate pawh a hrilh duh lo—mi pakhat hnênah tih loh!
Kum thum chhúng a pasal Bryan enkawlin a phílí buai a. Hetih chhúng zawng hian a kiangah—vàntláng hmuh loh tùra inthup chungin—a thianpa Keanu chu a awm reng thìn. A awm loh paw’n phone call hmang talin kár tin a be ngei ngei thìn. Kum 2023, August ni 5-a Bryan a boral pawh khán Sandra-i kawngka kika, a khawhar hnèma, a mittui hrûk hulsak thìntu chu a thianpa Keanu hi a ni. Lemchan lama a lêt leh theih nána fuiha tanpuitu ber pawh Keanu Reeves tho hi a ni.
- Hman ata tawh inthian thatna leh…?
“Speed” an chan zawh tawh hnu lawk khán—Reeves-a gentleman-zia leh smart-zia ti lang chiangtu thil thleng dangdai tak mai chanchin an nei a. Kum 2021-a Esquire magazine-in Sandra Bullock an interview tumin, chu “thil thleng” chu Sandra hian a puang chhuak a ni.
Tum khat chu—“Speed” an chan lai vêl emaw, an chan zawh hnu zâwk emaw a ni maithei—Sandra hian truffles (chocolate chi khat) leh champagne, eia a la in ngai miah loh a sawi chhuak palh a ni àwm a. A hnu lawkah, Keanu hian Sandra te in hi bike-in a pan nghâl.
A thiannu nèna lo tìtî mék Sandra-i kawngka chu Reeves chuan a kik leh a. Kawngka rawn hawnsaktu Sandra hnênah chuan pangpár leh a la in ngai loh champagne leh a truffles la ei ngai miah loh, a rawn kensakte chu pêk pahin, ‘I ei ve chhin duh tâk mialin…’ Keanu chuan a ti sap a.
Sandra chuan läwm takin a a lo dawng a. Champagne chu a sawh hawng nghâl. Truffles nèn chuan eiin an in ho bawk. Keanu chu rei pawh a awm lo; hmeichhe date tùra a biak nula lam tùrin a kalsan lehnghâl a ni.
- Va sawi tlai ve…mahse, a tha zawk e!
Kum 2018 kum a ni. Ellen DeGeneres chuan a show in léngah Sandra Bullock a sáwm a. Zawhna dangdai zet mai zâwtin Sandra paw’n mipui thin tháwng dawttu chhànna a pe bawk. Chu chu, 1994 kuma “Speed” an chan laia a chanpui pa, Keanu Reeves a star thinzia thu a ni!
‘Keanu kha hmel tha ka ti tak zet. A hmél ka hmuh khán ka nui leh ver ver zêl! Awm dàn thiam pawh har ka ti thìn … mahse, amah khân min duh ve lo a ni ang, vawi khat mah kan in-date lo,’ tiin a inpuang tlai khaw-hnu!
A kum lehah, Ellen bawk hian a show-ah Keanu Reeves hi a sáwm ve leh. Sandra thu sawi video clip chu a entír a. ‘Min lo star tih ka hriat loh ang bawkin, amah kha ka star ve tih pawh a inhre bîk miah lo a lo nih hi!’ a ti ve chiah!
Ellen-i’n eng vànga hrilh lo nge a nih a zawh chuan, Keanu chuan tawi tê-in, ‘Hna thawk lai kan ni ve ve aläwm,’ tiin a chháng. Sandra paw’n a hnu deuhah, ‘Lo inngaizáwng ta ila, a hnuah kan inthen leh emaw a ni ang a, kan inthian thatna hi a chhe vek ang. Tünah chuan thian kan nihna hi a hlu êm êm zâwk a, kan roh tlat a ni,’ a ti ve bawk.
An inthian thatna—thil dang eng maha an thleng phal lohna hi, an inkára malsàwmna thlentu a ni daih mai.