Aizawl: Lunglei district-a Lungsen Aspirational Block chhunga primary sikul thlan bika English bulthut zirna, ELF ‘Learn to Read’ English Literacy Programme hnuaiah zirlaiten English thiamna kawngah hma an sawn hle tih March, 2026-a annual report tihchhuahah tar lan a ni.
Lunglei Deputy Commissioner Office, Disha Foundation leh ELF English tangho hma laknain nikum August thla khan he programme hi tan a ni a; sorkar primary sikul 10 thlan chhuahah kalpui niin zirlai 268-in an chhawr a. A tan tirhah zirlaite thiamna dinhmun endikna kalpui hmasak niin chumi mil chuan pawl tina zir tur ruahman a ni a. Zirtirtute chu online training leh video kaltlangin naupangte zirtir dan tur zirtir hmasak an ni a. Zirlaite chu an tih chhinna tur lehkhabu pek an nih bakah zirtirtute pawh zirtirnaa puitu hmanrua pek an ni bawk.
February thla khan naupangte hmasawn dan endikna, ‘final assessment’ buatsaih niin ziak leh kaa chhangin zirlaiten endikna hi an hmachhawn a. ELF English team-ten online-a zirlaite tawngkaa an kawmnaah zirlaiten tawng thiamna, lam rik dan leh inrintawkna kawngah hmasawnna nasa tak an nei tih hmuh a ni.
A tir leh a tawpa zirlaite thiamna dinhmun khaikhinin hmasawnna nasa tak hmuh a ni a. Thu mal hriatnaah zirlaite thiamna chu 25% atangin 59%-ah a pung a. Thu chang kim, sentence level thiamnaah pawl thum zirlaiten 18% atangin 66%-ah hmasawnin pawl li zirlaite hmasawnna chu 13% atangin 74%-ah a kai bawk a. Zirlaiten English chhiar, hriat thiam leh hrilhfiah kawngah pawh hma an sawn hle a ni.
Programme hlawhtlin vang hian Lunglei district Bawrhsap Navneet Mann-i kaihhruaina hnuaiah zirna kum thar 2026–27 lo awm turah sikul tam zawkah he English Literacy Programme hi kalpui chhunzawm tura ruahman a ni.