Aizawl: MNF Sr Vice President Dr R Lalthangliana, Dampa bialtu MLA chuan Inrinni khan a bial chhung, East Block huam chhunga Bawlte, Darlung, S. Sabual leh Bawngthah khuate a tlawh.
He’ng khua a tlawhnaah bialtu MLA chuan, Pathianin leilung hausakna leh ram tha min pek hi tangkai taka hmanthiam a tul tih a sawi a. Kuthnathawh hi ram siamna pawimawh berte zinga mi a ni, hei hi an indawmkan theihna kawng pawimawhber nia a hriat thu a sawi.
Aizawl tlang atanga bial mite mamawh leh tangkai tur ngaihtuah chiang mang lova inpapek leh ngawt thin hi a dik a tih loh avangin, a hmun ngeia bial mipuiten zalen taka an mamawh tak an thlen theihna turin bial a tlawhchhuak thin tih a sawi a. “Bial hi a theih anga tam tlawh ka duh bawk a ni. MLA fund hi hmasawnna tak tak, kan zavaia kan chhawr tangkai theihtur atana hman tur a ni,” a ti.
Dampa bial hmasawnna turin hmachhawp tam tak a nei tih sawiin, Dr R Lalthangliana chuan, “Police thuam that, health, education leh department dang dangah hmasawnna tur tam tak ka hmu. Kawngpui tha kan neih theihna atana kan hmalak mekna hi chunglamin min hriatpui a, theihtawp chhuahin hnathawh hi vil zel ka tum a, bialtu MLA mawhphurhna niin ka hre bawk,” a ti bawk.
Heng bakah hian, mi tam berte hi kuthnathawka eizawngte an nih avangin, an thlai tharte awmze nei leh awlsam zawka an tihral theihnan leh, an hnathawhna tur leilung tha an pawh theihna turin agriculture/horticulture link road an neih tam tul a tih thu sawiin, chu chu a a thupui ber leh a hmathlir pakhat a nih thu a sawi bawk.