Aizawl: UD&PA, Aizawl Smart City, Aizawl Municipal Corporation (AMC) leh Central YMA tangkawp, Aizawl khawpui faina atana Coordination Committee buatsaihin Inrinni khan Lammual leh a chhehvel bakah Aizawl khawpui chhung YMA branch tam zawkah ‘Faina Hnatlangpui 2026’ neih a ni.
Inrinni zing dar 7:30 khan Vanapa hall kawtah Faina Hnatlangpui hi tan a ni a, Joseph H. Lalramsanga, Municipal Commissioner, AMC-in kaihruaiin Central YMA General Secretary Prof. Malsawmliana’n thu a sawi a, UD&PA Commissioner & Secretary Lalmalsawma Pachuau chuan Faina Hnatlangpui tanna leh Aizawl City YMA Branch Fai Intihsiakna 2026 a khuhhawng nghal a ni.
Kick-off zawh hian tlawmngai pawl thenkhat leh department ruat bikten zingkar hnatlang hi Lammual leh a chhevelah an nei nghal a, Aizawl khawpui chhunga YMA branch tam zawkin remchan dan angin mahni veng theuhah Faina Hnatlangpui hi an zawm ve nghal a, chhiat tawhna avang leh rokhawlhna dang avanga YMA branch hnatlang thei lo an awm bawk a, branch thenkhat Zirtawpnia hnatlang an awm bawk.
Faina Hnatlangpui pual hian bawlhhlawh tamna leh hmun bal zual lai 15 thlan chhuah niin a hnaivaia awm YMA branch-ten heng hmun tihfai hna hi an thawk nghal a, khuain a zir loh avangin hnatlangpui hi hmun tam takah a khaihlak a ni.
Hnatlangpui hi Comprehensive Plan for Municipal Solid Waste Management in Aizawl tihhlawhtlinna tur pakhat a nih bakah Aizawl khawpui hi India-a khawpui fai ber leh bawlhhlawh awm lohna Garbage Free Aizawl a nih theihna tura hmalakna zinga mi a ni.