Zirtawpniah 8th Hockey India Annual Awards sem chhuaki kum khat liam ta chhunga Indian hockey-a ti tha zual leh thawh hlawk zualte chawimawina hun hman a ni a. Hockey Mizoram pawh lawmman dawngtu zingah telin Rs. nuai 10 an an dawng tel.
Labour & Employment, Youth Affairs & Sports Minister Dr. Mansukh Mandaviya leh Minister of State for Youth Affairs & Sports Raksha Khadse ten an hmanpui.
Navneet Kaur leh Hardik Singh te chu hmeichhia leh mipa huangah Hockey India Balbir Singh Sr. Award for Player of the Year 2025 hlan an ni a, he Rs. nuai 20 ve ve a keng.
Kum 1980 Moscow Olympic Games-a India-in gold medal an lak tuma thawh hlawk tak, 1978 leh 1982 Asian Games-a silver medal pahnih laa 1982 Champions Trophy-a bronze medal la bawk, Zafar Iqbal chu Major Dhyan Chand Lifetime Achievement Award hlan a ni a, Rs. nuai 25 a keng tel.
Raghu Prasad RV chu 2025 FIH Umpire of the Year atana thlan a nih avangin chawimawi a ni a. Ishika pawh Hyderabad, Telangana-a FIH Hockey World Cup 2026 Qualifiers an khelh tuma Uruguay laka a khelh hmasak bera goal a thun avangin Deepika chu Poligras Magic Skill Award hlan a ni a, Abhishek pawh Hero Asia Cup Rajgir, Bihar 2025-a Player of the Tournament atana thlan a nih vangin chawimawi a ni.
Udita chu Women’s Asia Cup Hangzhou, China 2025-a Player of the Tournament atana thlan a nih avangin chawimawi a ni a, Navneet pawh Hyderabad-a FIH Hockey World Cup 2026 Qualifiers-a Player of the Tournament atana thlan a nih vangin chawimawi a ni a. Mi mal lawmman dawngtute hian Rs. nuai 1 theuh an dawng.
Kum 2025-a 15th Hockey India National Championships-a an chet that avangin member unit pasarih te hnenah cheng nuai 10 theuh hlan an ni bawk. Heng lawmman dawngtute hi Hockey Mizoram, Hockey Haryana, Hockey Jharkhand, Hockey Punjab, Hockey Madhya Pradesh, Hockey Association of Odisha leh Hockey Uttar Pradesh te an ni.
Hero Asia Cup Rajgir 2025-a gold medal latu mipa hockey team chu lawmpuina hlan an ni a, player tinin Rs. nuai 3 theuh an dawng a, support staff-ten Rs. nuai 1.5 theuh an dawng a. FIH Hockey Men’s Junior World Cup Tamil Nadu 2025-a bronze medal latu, Indian junior mipa team pawh chawimawi an ni a, player-ten Rs. nuai 5 theuh dawngin support staff-ten Rs. nuai 2.5 theuh an dawng.
Hockey India Baljit Singh Award for Goalkeeper of the Year 2025 chu Bichu Devi Kharibam hnenah hlan a ni a, Sanjay-a’n Hockey India Pargat Singh Award for Defender of the Year 2025 a dawng thung a. Sumit-a’n Hockey India Ajit Pal Singh Award for Midfielder of the Year 2025 a la a, Hockey India Dhanraj Pillay Award for Forward of the Year 2025 chu Sukhjeet Singh hnenah hlan a ni a. Rs. nuai 5 theuh an dawng.
Thiamna par chhuak thar zingah Prince Deep Singh-a’n Hockey India Jugraj Singh Award for Upcoming Player of the Year 2025 (mipa under 21) a la a, Sakshi Rana chuan Hockey India Asunta Lakra Award for Upcoming Player of the Year 2025 (hmeichhia under 21) a la thung a. Rs. nuai 10 ve ve an dawng.
Official huangah Hockey India President Award for Umpire/Umpire Manager of the Year 2025 (cheng nuai 2.5) chu Sourabh Singh Rajput hnenah hlan a ni a, Biswaranjan Sarangi-a’n Hockey India President Award for Technical Official of the Year 2025 (Rs. nuai 2.5) a dawng.
Hockey Jharkhand chu an biala hockey hmasawnna atana an hmalakna avangin Best Member Unit of the Year 2025 (Rs. nuai 2.5) hlan an ni.
Hockey India President Award for Outstanding Achievement 2025 (Rs. nuai 5) chu Roundglass Punjab Hockey Academy atangin Shri Sardar Sarpal Singh hnenah hlan a ni a, Hockey India Jaman Lal Sharma Award for Invaluable Contribution 2025 (Rs. nuai 5) chu Manoj Konbegi hnenah hlan a ni.
Ram tana thawk chhuak a mimal hlawhtlinna chhinchhiah tlak tak takte pawh he hunah hian chawimawi an ni a. Manpreet Singh chuan ram aiawhin vawi 400 a khel tling a, hmahruaitu niin Rs. nuai 4 a dawng a. Harmanpreet Singh-a’n ram aiawha vawi 250 a khelh tlin avangin Rs. nuai 2.5 a dawng bawk. Navneet Kaur leh Nikki Pradhan ten vawi 200 khel tlingin Rs. nuai 2 ve ve an dawng a. Hardik, Krishan Bahadur Pathak, Nilakanta Sharma, Jarmanpreet Singh, leh Salima Tete ten vawi 150 khel tlingin Rs. nuai 1.5 theuh an dawng bawk. Abhishek, Sukhjeet Singh, leh Dilpreet Singh ten ram aiawha vawi 100 an khelh tlin avangin Rs. nuai 1 theuh an dawng a ni.